Tags-Ghar

baat jaisī bhī ho tāsīr hai shart-e-lāzim
sher vo kyā jo kisī dil meñ bhī ghar kar na sakā

ghar bhī vahī ghar vaale bhī vahī par kyā lage is māhaul meñ jī
dīvār se rishta qaa.em hai saa.e se rishta TuuT gayā

shor bāzār se nahīñ uThtā
raat ko 'mīr' ghar ga.e shāyad

koī bhī ghar meñ samajhtā na thā mire dukh sukh
ek ajnabī kī tarah maiñ ḳhud apne ghar meñ thā

laḌne kī taab to miTTī ke makānoñ meñ hai
kāñch-ghar mausam-e-barsāt meñ mar jaate haiñ

shab-e-visāl kab aatī hai mere ghar ai charḳh
ki us ke pīchhe se dauḌī sahar nahīñ aatī

naġhmagī se sukūt behtar thā
maiñ thā aur ik kirā.e kā ghar thā

ghir gayā thā maiñ ik jazīre meñ
aur chāroñ taraf samundar thā

vahshatoñ meñ balā kā thā phailāv
dasht aur ghar kā ek manzar thā

ek dīvār darmiyān rahī
varna donoñ kā ek hī ghar thā

phir aaj ghar mujhe le aa.ī juuñ kā tuuñ ik baat
ki jaise koī khaḌā dekhtā rahā mujh ko

maiñ jis meñ rahtī huuñ merā ghar hai
yahāñ kī dīvār-o-dar ke andar

qasr-e-shahī meñ jubba-o-dastār bik ga.e
nīlām ghar meñ qāfila-sālār bik ga.e

dushman o dost se ābād haiñ donoñ pahlū
dil salāmat hai to ghar ishq kā barbād nahīñ

chalā huuñ ghar se maiñ ahvāl-e-dil sunāne ko
vo muntazir haiñ mirā zabt āzmāne ko

shām-e-ġham tere tasavvur hī se āñkhoñ meñ charāġh
varna mere ghar meñ ho aur raushnī tere baġhair

tirā kyā kaam ab dil meñ ġham-e-jānāna aatā hai
nikal ai sabr is ghar se ki sāhib-ḳhāna aatā hai

ilāhī kis kī sham-e-husn se raushan hai ghar merā
ki ban jaatā hai jugnū aaj jo parvāna aatā hai

barq kī tarah se betāb jo haiñ ai 'nādir'
tār-ghar kis kī vo lene ko ḳhabar jaate haiñ

'bahr' kyā kūcha-e-jānāñ se phire ghar kī taraf
kabhī dekhā nahīñ bahte hue dariyā ulTā