Tags-Ghar

tū ne muñh pherā to ham aise lage
jis tarah aadmī be-ghar ho jaa.eñ

yūñhī ehsās-e-nadāmt to nahīñ un ko 'hasan'
apne hāthoñ se hī ghar apnā jalā.e hoñge

sāhab-e-ḳhāna banā aatā hai jab aatā hai ishq
aur apne ghar meñ ḳhud mehmān ho jaate haiñ ham

ham jo ye sāmān ghar laate haiñ ḳhud ko bech kar
ek din ghar kā yahī sāmān ho jaate haiñ ham

ham apnī jaan hathelī pe rakh ke ghar se 'nasīm'
nikal paḌe to ka.ī mo.ajize nazar aa.e

rañj-e-rusvā.ī nahīñ duniyā hai rusvā.ī kā ghar
haiñ sabhī rusvā to yuuñ samjho na tum rusvā na ham

na Thaharnā hī munāsib na uTh ke jaanā hī
balā ke ghar meñ hameñ mezbān bhuul ga.e

ab is se pahle ki rusvā.ī apne ghar aatī
tumhāre shahr se ham bā-adab nikal aa.e

kyā ajab kār-e-tahayyur hai supurd-e-nār-e-ishq
ghar meñ jo thā bach gayā aur jo nahīñ thā jal gayā

bad-mastiyoñ ke shauq ne tūfāñ uThā.e haiñ
baiThe haiñ ham bahā.e hue ghar sharāb meñ

kab zamāne meñ hai mohtāj-e-makāñ ḳhāna-ḳharāb
ho ga.ī dil meñ kisī ke jo jagah ghar jaanā

subah se raat tak ghar meñ baTī hai
zarā sā chheḌ do to hañs paḌī hai

jaise koī sayyāh safar se lauTe
jab shaam ko tum lauT ke ghar aaoge

sunte haiñ phir chhup chhup un ke ghar meñ aate jaate ho
'inshā' sāhab nāhaq jī ko vahshat meñ uljhāte ho

vo har machhlī jo machhlī ghar kī paidāvār ho sāhab
vo machhlī ghar ko hī apnā samundar maan letī hai

ghar se nikal aatā huuñ aksar subah ke taḌke vahshat meñ
jhiil meñ patthar pheñk ke din-bhar vaqt-guzārī kartā huuñ

batā.ūñ kis havāle se unheñ bairāg kā matlab
jo taare pūchhte haiñ raat ko ghar kyuuñ nahīñ jaatā