Tags-Ghar

nikal paḌā hai koī ghar se bijliyāñ le kar
mirā chaman hī nishāna hai kyā kiyā jaa.e

khilnā kahīñ chhupā bhī hai chāhat ke phuul kā
lī ghar meñ saañs aur galī tak mahak ga.ī

terā ghar aur merā jañgal bhīgtā hai saath saath
aisī barsāteñ ki bādal bhīgtā hai saath saath

ajab andāz se ye ghar girā hai
mirā malba mire uupar girā hai

lagā.ī aag us ne shahr meñ itnī safā.ī se
ki us ke ghar pe uḌ ke ik bhī chiñgārī nahīñ aa.ī

baḌe shauq se mirā ghar jalā koī aañch tujh pe na aa.egī
ye zabāñ kisī ne ḳharīd lī ye qalam kisī kā ġhulām hai

ham ne ghar kī salāmtī ke liye
ḳhud ko ghar se nikāl rakkhā hai

shaam hote hī chale aate haiñ kuchh farzī ḳhayāl
kyā mire lafz unheñ ghar sā mazā dete haiñ

batā de vahshatoñ kī fauj ko chalī jaa.e
batā de jā ke nahīñ yuuñ bhī aaj ghar koī

uḌāne ke liye kuchh kam nahīñ hai ḳhaak ghar meñ bhī
vo mausam hī nahīñ haiñ jo divāna karne vaale the

zulmateñ vahshat-e-fardā se niDhāl
DhūñDhtī phirtī haiñ ghar ḳhvāboñ kā

'shād' ik bhiiḌ lagī rahtī thī jis ghar meñ vahāñ
aane vaalā hai na ab koī na jaane vaalā

vo jis kī dhun meñ ham itvār ko bhī ghar na rahe
milā to apnī taraf 'shām' dekhtā bhī na thā

khaḌī dhuup meñ apne ghar se nikalnā
vo chiḌiyāñ vo bulbul vo titlī pakaḌnā

chhā.ī jaatī hai ye vahshat kaisī
ghar bayābān huā jaatā hai

ham jahāñ rahte haiñ vo dasht vo ghar
dasht lagte haiñ na ghar lagte haiñ

tum rañg ho tum nuur ho tum shīsha ho tum jaam
kirnoñ se bharī sub.h ho tāroñ se bharī shaam

har ek ghar kā darīcha khulā hai mere liye
tamām shahr hī dāman-kushā hai mere liye

ham dil kī tabāhī kā ye sāmāñ na kareñge
is ghar meñ kisī aur ko mehmāñ na kareñge