Tags-Ghar

har raat charāġhāñ sā rahā kartā hai ghar meñ
ik zaḳhm mire dil meñ sitāroñ kī tarah hai

jaañ apnī gañvā kar kabhī ghar apnā jalā kar
dil un kā har ik taur se bahlā to ga.e ham

be-ghar huuñ maiñ 'imtiyāz' jab se
andesha-e-bām-o-dar nahīñ hai

ham jaanā chāhte the jidhar bhī nahīñ ga.e
aur intihā to ye hai ki ghar bhī nahīñ ga.e

aañch sayyād ke ghar tak pahuñchī
itnī sho.aloñ ko havā dī ham ne

dil ko aane lagā basne kā ḳhayāl
aag jab ghar ko lagā dī ham ne

paivast haiñ is ghar se bahut aap kī yādeñ
guzre hue lamhāt haiñ zanjīr nahīñ hai

maiñ tere ghar yuuñ hī be-qaid aatā jaatā rahūñ
tirī nazar meñ mirā e.atibār zinda rahe

ḳhush nahīñ aa.e bayābāñ mirī vīrānī ko
ghar baḌā chāhiye is be-sar-o-sāmānī ko

na hai hasīnoñ meñ kaj-adā.ī na zindagī meñ koī burā.ī
hai nekiyoñ hī kā ghar ḳhudā.ī agar tū ḳhud ḳhud-nigar hai pyāre

tire hī dil meñ hai jalva-farmā butoñ kī sūrat ḳhudā kā jaadū
yahī hai dair aur yahī hai ka.aba yahī mohabbat kā ghar hai pyāre

tamām lazzateñ duniyā ke dil meñ rakkhī haiñ
ḳhudā ne sukh ko magar apne ghar se joḌā hai

dar-o-dīvār bhī rulāte haiñ
ghar meñ tanhā rahā nahīñ karnā

chāñd us vaqt bhī to hotā hai
jab kisī ghar meñ shab nahīñ hotī

har ik raste pe chal kar sochte haiñ
ye rasta jā rahā hai apne ghar kyā

ghar dil meñ kar chukā hai mirā nauha-e-qafas
sayyād qaid hogā agar maiñ rihā huā

sayyād kā ghar aaj hai jaise chaman thā kal
shāyad qafas kā baiThne vaalā rihā huā

maiñ jo kahtā thā vahī baat huā kartī thī
mere ghar meñ koī jaadū kā diyā thā pahle

darvāzoñ ke pahre haiñ dīvāroñ ke sañgīneñ
hotā jo mire bas meñ is ghar se nikal jaatā

terī galī se chhuT ke na jā-e-amāñ milī
ab ke to merā ghar bhī mirā ghar na ho sakā