Tags-Ghar

vo tere aane kī thī ḳhushī ki 'atīq-ahmad'
jo ghar meñ qaidī the sab parinde uḌā rahā thā

pas-e-dīvār khaḌā hai koī tanhā kab se
tū na nikle tire ghar se tirā saaya nikle

ik ghar nīchī dīvāroñ kā
ik ziina chāñd-sitāroñ kā

ashk betāb va nigah be-bāk va chashm-e-tar ḳharāb
chashm-e-bīnā se agar dekho to ghar kā ghar ḳharāb

sab kuchh to hai kyā DhūñDhtī rahtī haiñ nigāheñ
kyā baat hai maiñ vaqt pe ghar kyuuñ nahīñ jaatā

rañg-e-ḳhullat se dil-e-shaidā muraqqa.a ban gayā
ye ḳhudā kā ghar bhī is sūrat se but-ḳhāna huā

apnī nazar se TuuT kar apnī nazar meñ gum huā
vo baḌā bā-shu.ūr thā apne hī ghar meñ gum huā

kahāñ ye ghar aur kahāñ ye daulat jo aap aate udhar ko ai jaañ
jo aan nikle ho banda-parvar to kiije ab koī dam navāzish

na ārām shab ko na rāhat savere
ġhalāzat meñ ghar nāliyoñ meñ basere

vo mere ghar ke sāmne se jaa.eñ is tarah
ai ham-nashīñ raqīb kā ghar to udhar nahīñ

aamad ne terī kar diyā ābād is tarah
ḳhud apnā pahlī baar mirā ghar lagā mujhe

tum ko kuchh yaad hai ghar ghar meñ mirā charchā thā
ab usī shahr meñ phirtā huuñ maiñ tanhā dekho

āḳhirī sham.a bujhāte hue apne ghar kī
maiñ dekhe the kisī taaq meñ jalte hue rañg

sub.h-dam ghar se nikalnā hī agar paḌ jaa.e
niiñd se aañkh churātā huuñ masalte hue rañg

tamām goroñ ke hairat se rañg uḌ jaate
jo ghar se aaj nikaltā vo merā sāñvaliyā

dasht le jaa.e ki ghar le jaa.e
terī āvāz jidhar le jaa.e

hamāre dil meñ rahī hai bas ek hī ḳhvāhish
dayār-e-yār meñ apnā bhī ghar zarūrī thā

duur ik ḳhāmosh bastī kī galī meñ dekhnā
hai tamannā mutma.in maḳhdūsh ghar ke aas paas

ghar kī dahlīz se gehūñ ke khet tak
chaltā phirtā koī kārobār aadmī

hazāroñ bijliyāñ TūTīñ nasheman bhī jalā lekin
koī to hai jo is ghar kī nigahbānī meñ rahtā hai