Tags-Ghar

bāhar galī meñ shor hai barsāt kā suno
kunDī lagā ke aaj to ghar meñ paḌe raho

kyuuñ chalte chalte ruk ga.e vīrān rāsto
tanhā huuñ aaj maiñ zarā ghar tak to saath do

maiñ aThārah saal kī thī jab mere ghar pahlā patthar girā aur phir mujhe do ajnabī hāthoñ ne narmī se thāmā
baabā kī aañkh nam ho ga.ī kyūñki maiñ ro rahī thī

vo gharauñde tire bachpan meñ bhī Dah detī thī
ab to vo khel kī bāteñ bhī nahīñ ghar na banā

saarā zamāna sar āñkhoñ par letā hai
rusvā huuñ ghar meñ apne urdu ban kar

maiñ ghar se jā.ūñ to taalā lagā ke jaatī huuñ
kuchh us kī shohrateñ kuchh e'tibār us kā hai

siine kī misāl aag hai chāñdī sā dhuāñ hai
kyā ḳhuub mire ghar kī tabāhī kā samāñ hai

shab-e-tārīk meñ tū ghar se nikal kar kabhī dekh
tujh se kyā kahtī hai dariyā kī ravānī bhī to sun

sab apne apne ghar meñ nazar-band ho ga.e
ab shahr pur-sukūn hai mash.hūr ho gayā

va.ada aane kā vafā kiije ye kyā andāz hai
tum ne kyuuñ sauñpī hai mere ghar kī darbānī mujhe

mujh se ġhurbat mol le kar kaun ghar le jā.egā
tum mujhe rusvā sar-e-bāzār-e-zar karte ho kyuuñ

uTh kar chalā jo paas se un ke to ghar talak
har har qadam pe zof se maiñ nā-tavāñ girā

maiñ apne ghar meñ diye kī tarah
jalnā chāhtā thā

ghar meñ ik kamra hai jahāñ par
bahut sī chīzeñ paḌīñ huī haiñ

tauba khaḌī hai dar pe jo fariyād ke liye
ye mai-kada bhī kyā kisī qaazī kā ghar huā

bāñdh rakkhā hai kisī soch ne ghar se ham ko
varna apnā dar-o-dīvār se rishta kyā hai

gahrī raat hai aur tūfān kā shor bahut
ghar ke dar-o-dīvār bhī haiñ kamzor bahut

be-nām dayāroñ kā safar kaisā lagā hai
ab lauT ke aa.e ho to ghar kaisā lagā hai

maslahat-kosh ho gayā 'māmūn'
ghir ke tanqīd karne vāloñ meñ