Tags-Ghar

na koī dīvār-o-dar thā koī na ham-safar ham-suḳhan thā koī
bichārī kā koī ghar kahāñ thā ki kah deñ ham apne ghar ga.ī vo

zehn meñ aur koī Dar nahīñ rahne detā
shor andar kā hameñ ghar nahīñ rahne detā

dasht-e-ġhurbat hai ki ābād hamāre dam se
ghar kā āñgan hai ki vīrān huā jaatā hai

duā.eñ māñgte rahte haiñ tujh se milne kī
udaas udaas mirā ghar bhī maiñ bhī duniyā bhī

mire ghar se ziyāda duur sahrā bhī nahīñ lekin
udāsī naam hī letī nahīñ bāhar nikalne kā

baraste bādaloñ se ghar kā āñgan Duub to jaa.e
abhī kuchh der kāġhaz kī banī ye kashtiyāñ rakh do

hamīñ par ḳhatm kyuuñ ho dāstān-e-ḳhāna-vīrānī
jo ghar sahrā nazar aa.e to us meñ bijliyāñ rakh do

jab apne ghar pe bulātā huuñ maiñ kabhī un ko
unheñ zarūr koī ḳhaas kaam hotā hai

ghar meñ kyā aayā ki mujh ko
dīvāroñ ne gher liyā hai

har din meñ va.ada kartā huuñ
shaam se pahle ghar ā.ūñgā

aag ghar kī unheñ bhī yaad rahe
shahr meñ jo kabhī fasād kareñ

tamām raat dar-e-mai-kadā pe kaaTī hai
sahar qarīb hai ab apne ghar hī jā.eñge

ain-mumkin hai charāġhoñ ko vo ḳhātir meñ na laa.e
ghar kā ghar ham ne uThā rāhguzar par rakkhā

us kī āvāz pe bāhar nikal aayā huuñ 'jamāl'
saarā asbāb-e-safar rah gayā ghar par rakkhā

kyā din the jab nazar meñ ḳhizāñ bhī bahār thī
yuuñ apnā ghar bahār meñ vīrāñ na thā kabhī

ab kisī tarah dil nahīñ lagtā
ghar meñ sab kuchh to hai sivā ghar ke

kitnā kamzor hai īmān patā lagtā hai
ghar meñ aayā huā mehmān burā lagtā hai

vāsta paḌtā hī rahtā hai tez havāoñ se apnā
ham be-ghar logoñ ke aksar jism bikharte rahte haiñ

sub.h-savere ghar se 'ḳhāvar' nikle ho phir dhyān rahe
kālī-rāt ke lamhe din kā ruup bhī dharte rahte haiñ

tanhā.ī kā rog na paal
ghar se bāhar paaoñ nikāl