Tags-Ghar

khulā bhī ab dar-e-zindāñ to jā.ūñgā maiñ kahāñ
ki rāste hī nahīñ yaad apne ghar ke mujhe

kabhī in chiḌiyoñ se bhī pūchhnā hai
tumhārā ghar kahāñ hai

kyā jaane kab ghar pahuñcheñge mela hai yā bhūl-bhulayyāñ
pal chhan pal chhan karte karte yug hī biit chale mele meñ

jī haañ 'ashk' vahī haiñ lekin aaj haiñ yuuñ kuchh kho.e kho.e
jaise koī ghar ko jaate sab kuchh chhoḌ chale mele meñ

ghar meñ das hoñ to ye raunaq nahīñ hogī ghar meñ
ek dīvāne se ābād hai sahrā kaisā

vo ḳhudā ke nek bande haiñ ki jin kī jeb meñ paisa nahīñ hai
muflisī ke board ghar ghar muft bāñTe jā rahe haiñ

jaane kyuuñ ghar meñ mire dasht-o-bayābāñ chhoḌ kar
baiThtī haiñ be-sar-o-sāmāniyāñ sar joḌ kar

shab bhar to āvāra phire
lauT chaleñ ab apne ghar

vo chāñd jo utrā hai kisī aur ke ghar meñ
mujh ko to añdheroñ se rihā.ī nahīñ degā

haañ shahr-e-ārzū thā kabhī ye ujaaḌ ghar
ab khañDaroñ se is kī kahānī sunā karo

ghar kiyā hai ai sanam us meñ tirī tasvīr ne
band honā ġhair-mumkin dīda-e-dīdār kā

kisī ne ghar baḌe rakkhe hue the
kisī ne dil baḌā rakkhā huā thā

zaḳhm-e-ummīd bhar gayā kab kā
qais to apne ghar gayā kab kā

aag hai siine meñ tere maujzan tū yaad rakh
sham.a sī raushan añdhere ghar kī vīrānī meñ hai

kaisī pastī meñ ye duniyā ne basāyā hai mujhe
nazar aatā hai har ik ghar mire ghar se ūñchā

ḳhāk-e-'shiblī' se ḳhamīr apnā bhī uTThā hai 'fazā'
naam urdu kā huā hai isī ghar se ūñchā

mire liye mirī hijrat hī ajr kyā kam hai
maiñ chal rahā huuñ ki har raah mere ghar kī hai

ye shahr zinda hai lekin har ek lafz kī laash
jahāñ kahīñ se uThī shor mere ghar meñ rahā

is ko koī ġham nahīñ hai jis kā ghar patthar kā hai
kyā karegā tez tūfāñ bām-o-dar patthar kā hai

aa ga.e haiñ aag kī zad meñ hazāroñ jhoñpaḌe
mujh ko lekin hai tasallī apnā ghar patthar kā hai