Tags-Ghar

andāz hū-ba-hū tirī āvāz-e-pā kā thā
dekhā nikal ke ghar se to jhoñkā havā kā thā

shāhrāheñ daf.atan sho.ale ugalne lag ga.iiñ
ghar kī jānib chal paḌā hai shahr gherā kar tamām

kyā ġham jo hasratoñ ke diye bujh ga.e tamām
dāġhoñ se aaj ghar meñ charāġhāñ kareñge ham

raushnī hai na havāoñ kā guzar hai is meñ
mere hisse meñ jo aayā hai ye ghar kaisā hai

koī ujlā sā bhalā sā ghar thā
kis ko dekhā thā vahāñ yaad nahīñ

pyaar kī jot se ghar ghar hai charāġhāñ varna
ek bhī sham.a na raushan ho havā ke Dar se

ghar hai to dar bhī hogā dīvār bhī rahegī
zanjīr bhī hilegī jhankār bhī rahegī

ghar se jo shaḳhs bhī nikle vo sambhal kar nikle
jaane kis moḌ pe kis haath meñ ḳhanjar nikle

ghar ko ghar banāne meñ umr biit jaatī hai
phir makān girne meñ der kitnī lagtī hai

chalo sahrā ko bhī ab āzmā.eñ
sunā thā ghar meñ āsānī bahut hai

mirī pahchān merā gyaan hijrat
sadā ausān meñ be-ghar rahā huuñ

jañgal ke biich vahshat ghar meñ jafā o kulfat
ai dil batā ki tere maare ham ab kidhar jaañ

ḳhalvat-e-dil meñ chain se baiTho kis se takalluf karte ho
ghar hai tumhārā tum ho yahāñ mehmān bhī sāhab-ḳhāna bhī

tah-dar-tah jañgal ke andar
us kā ik chhoTā sā ghar thā

zarūratoñ ne satāyā hai is qadar mujh ko
ġham-e-ma.āsh ne ghar se nikāl rakkhā hai

badal Daale haiñ kitne ghar ḳhushī ke vāste ham ne
magar ye ġham hamesha ghar hamārā DhūñDh lete haiñ

haa.e vo ghar ki jis meñ pesh aa.e
dastkī hādsāt andar se

bastī meñ hai vo sannāTā jañgal maat lage
shaam Dhale bhī ghar pahuñchūñ to aadhī raat lage

muTThī band kiye baiThā huuñ koī dekh na le
chāñd pakaḌne ghar se niklā jugnū haat lage

ḳhat meñ dil kī bāteñ likhnā achchhī baat nahīñ
ghar meñ itne log haiñ jaane kis ke haat lage