Tags-Ghar

kachche āñgan kā vo ghar vo bām-o-dar
gaañv kī pagDañDiyāñ vo rahguzar

butān-e-sīm-tan ke vasl se ham faiz paate haiñ
vo aate haiñ to apne ghar meñ daulat aa hī jaatī hai

kisī ko pyaar karegā shabāb meñ tū bhī
tire bhī ghar meñ jalegā charāġh-e-ḳhāna-e-ishq

insāñ huuñ ghir gayā huuñ zamīñ ke ḳhudāoñ meñ
ab bastiyāñ basā.ūñgā jā kar ḳhalāoñ meñ

ye mere ghar ke darīchoñ meñ raushnī kaisī
yahāñ charāg kā kyā silsila nikal aayā

bahut ġhurūr hai bachchoñ ko merī himmat par
maiñ sar jhukā.e hue kaise aaj ghar jā.ūñ

ḳhuun oḌhe hue har ghar kā sarāpā niklā
aap ke shahr kā andāz nirālā niklā

koī khiḌkī bhī nahīñ ab to jo baaqī rakhtī
mere ghar se mire ham-sā.e ke ghar kā rishta

ye aur baat ki maujūd apne ghar meñ huuñ
maiñ terī samt magar mustaqil safar meñ huuñ

jab merā ghar bahisht sī gul-vādiyoñ meñ thā
us vaqt maiñ ghirā huā shahzādiyoñ meñ thā

balvā.iyoñ kā jis pe yahāñ kuchh asar na thā
vo ghar amīr-e-shahr kā thā merā ghar na thā

ye dar ye taaq ye chaukhaT ye ghar malāl kā hai
safar meñ jitnā hai zād-e-safar malāl kā hai

sambhāl rakkhā hai ab jis qadar hai sarmāya
ziyāda kuchh nahīñ bas ek ghar malāl kā hai

na ghar rahā na sukūñ nā ye zindagī hī rahī
gayā hai sab na magar dard yā-ilāhī gayā

pyāre beTe tū ne iiñT gaare cement aur sariye vaalā makān to banā liyā hai
merī duā hai ki ye mohabbat amn ḳhushī aur ḳhush-hāl se bharā ghar ban jaa.e

kahāñ to tai thā charāġhāñ har ek ghar ke liye
kahāñ charāġh mayassar nahīñ shahar ke liye

sambhal ai qadam ki ye kār-gāh-e-nishāt-o-ġham hai ḳhabar bhī hai
jise log kahte haiñ rahguzar kisī pā-shikasta kā ghar bhī hai

tumhāre ghar 'nūn-mīm-rāshid' kā le ke aayā sifārshī ḳhat
magar ta.ajjub hai phir bhī tum se nahīñ maiñ kuchh 'faiz' pā rahā huuñ

maġhrib kī mad-bharī huī rātoñ meñ kho gayā
is ghar meñ koī laḳht-e-jigar raushnī kā thā

apne ghar meñ mirī tasvīr sajāne vaale
uñgliyāñ tujh pe uThā.eñge zamāne vaale