Tags-Ghar

shahr meñ ghar to aur bhī the magar
ik hamārā hī ghar jalā kyuuñ hai

dīvār-e-sukūñ baiTh ga.ī shiddat-e-nam se
barsā hai mire ghar pe agar abr-e-karam bhī

aa.e haiñ ghar mirā sajāne dard
kuchh na.e aur kuchh purāne dard

zid kā bistar sameTiye dilbar
ghar basāne meñ vaqt lagtā hai

be-ghar bhale hai lekin hañs ke vo kah rahā hai
bistar mirī zamīñ hai chhat merā āsmāñ hai

shāyad maiñ zindagī kī sahar le ke aa gayā
qātil ko aaj apne hī ghar le ke aa gayā

maiñ kahāñ aur kahāñ raat kā aanā par haañ
tere ghar se to bahut ġhair ke ghar kā hai lagāo

ghar meñ 'alvī' nayā rañg-o-roġhan huā
shakl thī ek dīvār pe mar ga.ī

agar maiñ yaad hotā to na aate
magar bhūle se aa.e mere ghar tak

aag jo ham ne jalā.ī hai tahaffuz ke liye
us ke sho.aloñ kī lapaT meñ ghar ke jal jā.eñge ham

chāñdnī meñ saare dukh tahlīl karne ke liye
ghar hai apnā aaj yā 'shāhīn' kal jā.eñge ham

kyā mahkeñ tamannāoñ ke gul buuTe
vīrāni-e-sahrā mire ghar meñ hai

jo ghar banāo to ik peḌ bhī lagā lenā
parinde saare mohalle meñ chahchahā.eñge

kuchh na pūchho zāhidoñ ke batin-o-zāhir kā haal
hai añdherā ghar meñ aur bāhar dhuāñ battī charāġh

kis salīqe se hai raushan mahfil-e-arz-o-samā
āsmāñ par chāñd hai ghar ghar dhuāñ battī charāġh

maiñ vo taa.ir huuñ jo huuñ kam-ḳharch aur bālā-nashīñ
ek jugnū yaañ hai aur ghar ghar dhuāñ battī charāġh

vo mustaqil ġhubār hai chāroñ taraf ki ab
ghar ke tamām rauzan o dar chun rahā huuñ maiñ

jo sunā ki ghar tire jā.eñge tire sehan o baaġh sajā.eñge
mire ashk uḌ ke havā ke saath unhī bādaloñ meñ samā ga.e

vatan jis roz se chhūTā hai vo manzar nahīñ miltā
dar-o-dīvār mil jaate haiñ lekin ghar nahīñ miltā

jab bhī ghabrā ke tujhe detā huuñ ik aadh sadā
log kahte haiñ ki is ghar meñ balā hai koī