Tags-Ghar

tū merī tishna-labī par savāl kartā hai
samundaroñ pe banāyā thā apnā ghar maiñ ne

har ā.īna mirī āñkhoñ se pūchh letā hai
vo aks kyā hue ābād jin se ye ghar thā

ghar apnā to bhūlī hī thī āshuftagi-e-dil
ḳhud-rafta ko ab dar bhī tirā yaad nahīñ hai

ghar meñ bulā ke qatl karo
darvāze meñ teġhā do

ik lamhe ko aayā thā sar-e-bazm vo ḳhush-rū
jo ghar se ga.e dekhne ghar tak nahīñ pahuñche

masarratoñ kī talab meñ jo ghar se niklā thā
usī ke hisse meñ aa.eñ udāsiyāñ bhī bahut

ye sajā-sajāyā ghar sāthī mirī zaat nahīñ mirā haal nahīñ
ai kaash kabhī tum jaan sako jo is sukh ne āzār diyā

na ḳhalvat-e-ġham-e-duniyā na bazm-e-jāñ 'tausīf'
tumhāre vāste ik bekasī kā ghar hai bahut

ghar ne apnā hosh sambhālā din niklā
khiḌkī meñ bhar gayā ujālā din niklā

mire ghar kī īñTeñ churā le gayā vo
nahīñ jāntā hai ki kyā le gayā vo

use kyā zarūrat thī vo jāntā hai
jo ghar meñ parāyā ḳhudā le gayā vo

haq-pasandī mizāj ho jis kā
muflisī us ke ghar nahīñ hotī

jī to kahtā hai ki bistar se na utrūñ ka.ī roz
ghar meñ sāmān to ho baiTh ke khāne ke liye

ek hī ghar meñ rahte the ham lekin donoñ anjāne the
jab is kā ehsās huā to apne raste paaT liye

tanhā.ī se thī merī mulāqāt āḳhirī
royā aur is ke ba.ad maiñ ghar se nikal gayā

mere hī saath ghar meñ nazar-band thā to phir
terā ḳhayāl kaun se dar se nikal gayā

tale teġh ke vo ibādateñ tirī shaan kī vo shahādateñ
vo hikāyateñ vo rivāyateñ tire saare ghar pe salām hai

vo chakā-chauñd hai niklegā na ghar se koī
dhuup agar chhiTke vo hañstā huā chehra dekhūñ

merā saaya ho ki maiñ koī to dhokā hai zarūr
ghar meñ ā.īna ki ghar se pare dariyā dekhūñ

nagrī nagrī phirā musāfir ghar kā rastā bhuul gayā
kyā hai terā kyā hai merā apnā parāyā bhuul gayā