Tags-Ghar

ye parinde bhī khetoñ ke mazdūr haiñ
lauT ke apne ghar shaam tak jā.eñge

banā kar rakh tū ghar achchhā rahegā
tū mālik ban kirā.e-dār kyuuñ hai

hañgāma-e-hastī se guzar kyuuñ nahīñ jaate
raste meñ khaḌe ho ga.e ghar kyuuñ nahīñ jaate

duniyā se alag ham ne maiḳhāne kā dar dekhā
maiḳhāne kā dar dekhā allāh kā ghar dekhā

goshe se nasheman ke aahoñ kā asar dekhā
sayyād kā ghar jalte be-barq-o-sharar dekhā

donoñ ke maze luuTe donoñ kā asar dekhā
allāh kā ghar dekhā maiḳhāne kā dar dekhā

shām-e-tanhā yūñhī chup-chāp añdhere le kar
ghar ke andar hī chalī aa.ī hai

palaT do baat na lo muñh se naam ruḳhsat kā
abhī se ghar nazar aane lagā udaas mujhe

jab ghaTā.eñ kabhī ghir kar aa.iiñ
kyā batā.eñ hameñ kyā yaad aayā

tumheñ bhī vaqt kī raftār kā pata chaltā
nikal ke ghar se galī tak to aa ga.e hote

dete haiñ mere jaam meñ dekheñ sharāb kab
aatā hai māhtāb ke ghar āftāb kab

Thahrā hai ik jagah dil-e-ḳhāna-ḳharāb kab
dariyā meñ ghar banā ke rahā hai habāb kab

bahtī rahī nadī mire ghar ke qarīb se
paanī ko dekhne ke liye maiñ taras gayā

ghar se 'sāhil' aa ke lauTī dhuup kyā
ho ga.ī merī to rusvā.ī bahut

lauT bhī aayā to sadiyoñ kī thakan lā.egā
sub.h kā bhūlā huā shaam ko ghar aane tak

ab is se pahle ki rusvā.ī apne ghar aatī
tumhāre shahr se ham bā-adab nikal aa.e

tum apne ghar ke añdhere meñ kyā dekhte ho dīvāroñ ko
ye sham.a kī sūrat jalnā kyā aa.egī havā bujh jāoge

aaj pahle-pahal tajraba ye huā iid hotī hai aisī ḳhabar hī na thī
chāñd ko dekhne ghar se jab maiñ chalī dūsrā chāñd mere qarīb aa gayā

vaqt hai kar lo marammat abhī ghar kī 'betāb'
abhī rauzan nahīñ zāhir hue dīvāroñ meñ

apne ghar ḳhud hī pashemān sā lauT aayā huuñ
maiñ samajhtā thā use merī zarūrat hogī