Tags-Ghar

na haath rakh mire siine pe dil nahīñ is meñ
rakhā hai ātish-e-sozāñ ko daab ke ghar meñ

phir bahāne jā.egā laavā lahū kā
ḳhisht-e-dil par ghar kī rakh buniyād taaza

jo kartā thā charāġhāñ sab ke ghar meñ
usī ke ghar diyā-bātī nahīñ hai

pashemānī hai vo tere junūñ kī
mire ghar aa ke jo jaatī nahīñ hai

hamāre ghar meñ utāreñge raah agar bhūle
haiñ mast Dolī ke un ke kahār holī meñ

vo merī parchhā.īñ hai yā maiñ us kā ā.īna huuñ
mere hī ghar meñ rahtā hai mujh jaisā hī jaane kaun

dair-o-ka.aba kī azmat musallam magar
mai-kada bhī ḳhudā hī ke ghar sā lage

dar-o-dīvār o saqf-o-bām sab apnī jagah par the
to phir kyā baat thī jis ke sabab be-ghar rahā huuñ maiñ

parā.ī aag mirā ghar jalā rahī hai so ab
ḳhamosh rahnā nahīñ ġhul machānā bantā hai

dīdanī hai ye mirā ghar mirā vīrāna bhī
is guzargāh pe kuchh der Thahar jā sayyāh

tujh ko ai dost dikhā.ūñ ki kahāñ rahtā huuñ
ye vo ghar hai ki jo shāyad kabhī ho saktā thā ghar

jin logoñ ne dil meñ tire ghar apnā kiyā hai
bāhar hai do-ālam se mirī jaañ vatan un kā

le chalī maut ba-sad-shauq hameñ saath apne
na huā jab koī sāmāñ tire ghar jaane kā

din-ba-din paañv kī tāqat meñ kamī hone lagī
'shād' sāmāñ karo is dasht se ghar jaane kā

dikhā.e gard ke ḳheme pa ghar nahīñ likkhā
safar to sauñp gayā vo shajar nahīñ likkhā

maiñ shab ke musāfiroñ kī ḳhātir
mish.al na mile to ghar jalā.ūñ

aaj inkār na farmā.iye aap
shab kī shab ghar mire rah jā.iye aap

jā.iye ghar ko na ghabrā.iye aap
ham na mar jā.eñge bas jā.iye aap

na.ī na.ī āñkheñ hoñ to har manzar achchhā lagtā hai
kuchh din shahr meñ ghūme lekin ab ghar achchhā lagtā hai

ham ne bhī so kar dekhā hai na.e purāne shahroñ meñ
jaisā bhī hai apne ghar kā bistar achchhā lagtā hai