Tags-Ghar

Dubo hī degā tumheñ ab nadī kā ye sailāb
kahāñ bachoge ki ab ghar meñ aa gayā paanī

koī aayā thā mere ghar meñ aur
saarā āñgan khulā khulā huā thā

hasrato dekho ye vīrāna-e-dil
is na.e ghar meñ basā.eñge tumheñ

to vo andāz jaise merā ghar paḌtā ho raste meñ
pa.e-iz.hār-e-hamdardī vo jab tashrīf laa.e haiñ

suunā lagā baġhair tire mujh ko saarā ghar
beleñ chaḌhīñ gulāb kī jab bath-rōm par

aaTā bhī ghī bhī ghar bhī yahāñ qīmatan mileñ
kyuuñ aa gayā maiñ shahr meñ gaañv ko chhoḌ kar

daraḳht suukh ga.e ruk ga.e nadī naale
ye kis nagar ko ravāna hue haiñ ghar vaale

vahshat dīvāroñ meñ chunvā rakkhī hai
maiñ ne ghar meñ vus.at-e-sahrā rakkhī hai

jaane kyā DhūñDhtā phirtā thā yahāñ merā vajūd
ik udāsī mire ghar ke dar-o-dīvār meñ thī

maiñ ne apne tanhā ghar ko
aadhī baat batā.ī hai

kabhī kabhī to use phūñkne ko jī chāhe
vo ghar ki jis kī bahut dekh bhaal karte haiñ

bātoñ ke nagar se aa rahe haiñ
ham apne hī ghar se aa rahe haiñ

shāyad mire badan kī rusvā.ī chāhtā hai
darvāza mere ghar kā bīnā.ī chāhtā hai

vahī muqīm hai jo apne ghar se bāhar hai
ki jitnā saaya hai saarā shajar se bāhar hai

use ye ghar samajhne lag ga.e haiñ rafta rafta
parindoñ se qafas āmāda karvānā paḌegā

ajiib mo.ajaza huā ki ek din
maiñ apne ghar kī DevḌhī meñ summun bukmum khaḌā huā

ham se ābla-pā jab tanhā ghabrā.eñge sahrā meñ
rāste sab tere hī ghar kī jānib ko muḌ jā.eñge

har tarah kī be-sar-o-sāmāniyoñ ke bāvajūd
aaj vo aayā to mujh ko apnā ghar achchhā lagā

subuk ho jā.eñge gar jā.eñge vo bazm-e-dushman meñ
ki jab tak ghar meñ baiThe haiñ vo lākhoñ man ke baiThe haiñ

lagtā hai ghar vahī jahāñ aapas meñ pyaar ho
varna to log rahte haiñ aur ik makān hai