Tags-Ghar

muntashir kar chukī āñdhī to ye ma.alūm huā
ik bagūle kī tarah ret ke ghar meñ ham the

kis DhiTā.ī se vo dil chhīn ke kahte haiñ 'amīr'
vo mirā ghar hai rahe jis meñ mohabbat merī

vahshat-e-dil ke tasadduq 'mumtāz'
ghar bayābān huā jaatā hai

be-sahāroñ kā hausla hī kyā
ghar meñ ghabrā.e dar pe aa baiThe

jab bhī ho mujh ko thakan tum ko duā detī huuñ
ghar ke kāmoñ meñ magan tum ko duā detī huuñ

maiñ use chhoḌ ke ḳhud hī chalā aayā thā kabhī
aur ab pūchhtā phirtā huuñ mirā ghar koī thā

sūraj rahā jo din meñ mire ghar se duur duur
phir maiñ ne raat meñ bhī ujālā nahīñ kiyā

sahāfī ho magar hoshyār rahnā
jo ghar meñ baat aḳhbārī karoge

gesū the vo mufassir-e-vallail-izā-sajā
ruḳh se ayaañ the ma.anī-e-vashshams-o-va-zzuhā

masjid meñ aa.e hañste hue jab vo gul-badan
ḳhushbū se sehan-e-masjid-e-jāme banā chaman

beToñ ko thā alī kā ishāra ki baiTh jaao
lāzim nahīñ ki vaaz meñ naanā ko tum satāo

vo lahū pī kar baḌe andāz se kahtā hai ye
ġham kā har tūfān us ke ghar ke bāhar aa.egā

na sahn-o-bām na dīvār-o-dar purāne haiñ
agar makīñ haiñ purāne to ghar purāne haiñ

ai mire ghar kī fazāoñ se gurezāñ mahtāb
apne ghar ke dar-o-dīvār ko kaise chhoḌūñ

pahūchuñgā zarūr aaj maiñ us shoḳh ke ghar meñ
dīvār to nīchī hai jo dar-bāz nahīñ hai

zillat mujhe manzūr magar aa.uuñ tire ghar
kyā harj mohabbat kā jo e.azāz nahīñ hai

ḳhazīne jaañ ke luTāne vaale diloñ meñ basne kī aas le kar
sunā hai kuchh log aise guzre jo ghar se aa.e na ghar ga.e haiñ

andar se muntashir huuñ ki bāhar shikasta hai
maiñ ḳhud shikasta huuñ ki mirā ghar shikasta hai

un rāstoñ meñ raat bhaTaktī hai be-sabab
aisā bhī ḳhauf kyā hai jo ghar hī na jā.iye

charāġh dil kā thā raushan bujhā gayā paanī
ki ban ke sail-e-balā ghar meñ aa gayā paanī