Tags-Ghar

dekh saare jahāñ ko Thukrā kar
terā dīvāna tere ghar aayā

jo aañkh kī putlī meñ rahā nuur kī sūrat
vo shaḳhs mire ghar ke añdhere kā sabab hai

ghar banāyā hai tire dil meñ usī din se sanam
saarī duniyā kī nigāhoñ meñ khaTaktā kyuuñ huuñ

ghar bhī mujhe to dasht sā lagtā hai tere bin
lagtā nahīñ hai dil mirā ujḌe dayār meñ

maiñ apne shahr meñ to ajnabī thā
maiñ apne ghar meñ bhī ab ajnabī huuñ

ghaTā.eñ ghir ke kyā kyā hasrat-e-farhād par roiiñ
chaman tak aa ga.iiñ nahreñ pahāḌoñ se ravāñ ho kar

use ab ke vafāoñ se guzar jaane kī jaldī thī
magar is baar mujh ko apne ghar jaane kī jaldī thī

pās-e-adū to dekho hameñ hukm hai 'nizām'
shab ko kaheñ na paas mire ghar ke soiye

samajh ke aag lagānā hamāre ghar meñ tum
hamāre ghar ke barābar tumhārā bhī ghar hai

bhaTak rahā huuñ maiñ sadiyoñ se dasht-e-ġhurbat meñ
koī to mujh ko batā.e kahāñ mirā ghar hai

mujh se ye soch ke vo merā patā pūchhe thā
tañg-dastoñ ke bhī ghar-bār to hote hoñge

us se bichhḌā maiñ añdheroñ kā makīñ huuñ varna
koī ghar ho dar-o-dīvār to hote hoñge

ghar ke dīvār-o-dar hī muḳhlis haiñ
baaqī duniyā to mujh pe hañstī hai

ret kā Dher nazar aate haiñ shahr ke saare puḳhta ghar
chīḳhoñ se dil Dar jaa.eñ to sab kuchh yūñhī lagtā hai

kursī mez kitābeñ? bistar anjāne se takte haiñ
der se apne ghar jaa.eñ to sab kuchh yūñhī lagtā hai

ḳhatra na aap kiije bas ab ḳhair shauq se
sonā uchhālte hue ghar ko sidhāriye

koī bhī na bolā jo maiñ ne ye pūchhā
koī us ke ghar kā pata jāntā hai

vo sannāTā ḳhirad kahtī hai jis ko ghar kī vīrānī
use bhī raunaq-e-dīvār-o-dar kahnā hī paḌtā hai

ba-har-sūrat guzar jaatī hai jo dil par guzartī hai
magar phir apne ghar ko apnā ghar kahnā hī paḌtā hai

aaj phir TūTeñgī tere ghar kī nāzuk khiḌkiyāñ
aaj phir dekhā gayā dīvāna tere shahr meñ