Tags-Ghar

jahāñ bisāt pe ghir jaa.e shaah narġhe meñ
vahāñ kabhī bhī piyāda ḳhatā nahīñ hotā

jahāñ bhī shaam huī ghar banā liyā apnā
makāñ bahut the magar be-makāñ rahe kaise

hai mire dil kī ye tasvīr nazar meñ rakh lo
ek TuuTā huā armān huuñ ghar meñ rakh lo

banā rakkhī haiñ dīvāroñ pe tasvīreñ parindoñ kī
vagarna ham to apne ghar kī vīrānī se mar jaa.eñ

ghar meñ rahte hue Dar lagtā hai
ab bayābān hī ghar lagtā hai

band kamre kī umas kuchh to shanāsā niklī
sub.h ke saath kā bhaTkā huā ghar to aayā

bahut hoshiyār logo is na.ī tārīḳh ke hāthoñ
na jaane kab tumhārā ghar kisī kā ghar nikal aa.e

kaun kahtā hai ki ham ma.asūm buzdil log haiñ
us ne to har ghar se ik qātil barāmad kar liyā

kuchh mas.ale to ghar ga.e, kuchh mas.ale bikhar ga.e
sab mas.ale guzar ga.e aur ek mas.ala rahā

banā rakkhī haiñ dīvāroñ pe tasvīreñ parindoñ kī
vagarna ham to apne ghar kī vīrānī se mar jaa.eñ

āñgan āñgan ḳhuun ke chhīñTe chehra chehra be-chehra
kis kis ghar kā zikr karūñ meñ kis kis ke sadmāt likhūñ

ashk se mere bache ham-sāya kyūñ-kar ghar samet
bah ga.ī haiñ kashtiyāñ is bahr meñ lañgar samet

ka.ī imāratoñ ko apnā ghar samajh ke jiyā
mire makān meñ fuqdān raushnī kā thā

jo saath laa.e the ghar se vo kho gayā hai kahīñ
irāda varna hamārā bhī vāpsī kā thā

intizām aap kī sarkār meñ yuuñ lāzim hai
band-o-bast aap kā ghar meñ rahe bāhar apnā

niiñd furqat meñ kahāñ maut se aane vaalī
ghar se behtar hai jo takiye meñ ho bistar apnā

ḳhāna-barbād kyā ishq ne tiflī se hameñ
ki miTā baiThī gharauñde kī tarah ghar apnā

kaam mukammal karne se bhī shaam mukammal kab hotī hai
ek parinda rah jaatā hai baaqī sab ghar aa jaate haiñ

roz nikal jaate haiñ ḳhālī ghar se ḳhālī dil ko le kar
aur apnī ḳhālī turbat par phuul sajā kar aa jaate haiñ

ik sarḳhushī muhīt hai chāroñ taraf magar
bastī meñ koī shaḳhs koī ghar bhī ḳhush nahīñ