Tags-Ghar

jugnuoñ ne phir añdheroñ se laḌā.ī jiit lī
chāñd sūraj ghar ke raushan-dān meñ rakkhe rahe

zindagī bhar apnī gūñgī dhaḌkanoñ ke saath saath
ham bhī ghar ke qīmtī sāmān meñ rakkhe rahe

matā-e-be-bahā aañsū zamīñ meñ bo diyā thā
palaT kar jab tirā ghar maiñ ne dekhā ro diyā thā

kyā bujh ga.e the mere hī ghar ke sabhī charāġh
yā shahr bhar meñ diyā bhī jalā na thā

masjid ho madrasa ho ki majlis ki mai-kada
mahfūz shar se kuchh hai to ghar hai chale-chalo

tirī talāsh meñ jaane kahāñ bhaTak jā.ūñ
safar meñ dasht bhī aatā hai ghar bhī aatā hai

nazar ye kis se milī nā-gahāñ ki yaad aayā
isī galī meñ kahīñ merā ghar bhī aatā hai

koī aatā hai kahīñ aise siyah-ḳhāne meñ
mere ghar kā hai ujālā shab-e-furqat merī

yaar aa.e jo mere ghar murād aa.e
jāgeñ jo nasīb rat-jagā ho

kuchh hasratoñ ke qāfile kuchh ḳhvāhishoñ ke ghar
bas ḳhvāb ḳhvāb hī meñ basar kar rahe haiñ ham

masrūf-e-vāz-o-pand the sultān-e-mashriqain
jo ghar se nikle khelte zohrā ke nuur ain

tum chup raho vo ghar meñ to masjid se phir ke aa.eñ
guzrī maiñ khel se mire bachche ko kyuuñ rulā.eñ

tere ghar meñ ġhulāmī palaT aa.egī
terī barbādiyoñ kā tujhe vāsta

ek nannhī parī hai āñgan meñ
jo mire ghar ko ghar banātī hai

ek na ik dīvār saraktī rahtī hai
ghar kī chhat har rut meñ Tapaktī rahtī hai

aaj kā din bhī be-masraf sī sochoñ hī meñ biit gayā
aaj ke din bhī yuuñ hī paḌe phir ghar ke saare kaam rahe

āsmāñ rutba mahal apne banāne vaalo
dil kā ujḌā huā ghar bhī koī ābād karo

ham kabhī aa.eñ tire ghar magar ā.eñge zarūr
tum ne ye va.ada kiyā thā ki nahīñ yaad karo

hai qalaq se dil kī ye hālat mirī ab tū ki maiñ
chār-sū phirtā huuñ apne ghar meñ ghabrāyā huā

koī to aisā ghar hotā jahāñ se pyaar mil jaatā
vahī begāne chehre haiñ jahāñ jaa.eñ jidhar jaa.eñ