Tags-Ghar

maiñ dushmanoñ meñ bhī ghir kar niDar rahā lekin
ḳhud apne jazba-e-haivāniyat se Dar bhī gayā

ik mirī shāḳh-e-nasheman phūñkne ke vāste
kis kī kaj-fahmī se ghar-bhar meñ ujālā ho gayā

chun chun ke tinke ham ne banāyā thā āshiyāñ
ye kyā ġhazab vo ghar bhī hamārā nahīñ rahā

tumhāre ghar meñ darvāza hai lekin tumheñ ḳhatre kā andāza nahīñ hai
hameñ ḳhatre kā andāza hai lekin hamāre ghar meñ darvāza nahīñ hai

ghar vaale mujhe ghar par dekh ke ḳhush haiñ aur vo kyā jāneñ
maiñ ne apnā ghar apne maskan se alag kar rakkhā hai

ye be-navā.ī hamārī saudā-e-sar hai ghar meñ basā diyā hai
makān ḳhālī hai lekin is ko nigār-ḳhāna banā diyā hai

mujhe kisī ne batāyā hai aap ke ye dost
hamesha raat ga.e apne ghar ko aate haiñ

maiñ tujh se kahtī huuñ bahnā ye kyā zamāna hai
na apne naam kā kuchh paas hai na ghar kī laaj

kyuuñ mujhe de gayā vo sannāTe
kyā mire ghar meñ ḳhāmushī kam thī

yahāñ hai boriyā ab bhī nadārat
bahut din ba.ad vo ghar aa rahe haiñ

aa kabhī dekh to is ghar meñ akele rah kar
merī har baat ko bātoñ meñ uḌāne vaale

tum pyaar kī sauġhāt liye ghar se to niklo
raste meñ tumheñ koī bhī dushman na milegā

baaġh tak jaate bhī haiñ aate bhī haiñ
ab qafas to ghar hamārā ho gayā

jī DhūñDhtā hai ghar koī donoñ jahāñ se duur
is aap kī zamīñ se alag āsmāñ se duur

bachche ḳhauf se ghar se bāhar na nikleñ
dhuul uḌtī hai galiyoñ meñ chaubāroñ meñ

jo saare din kī thakan oḌh kar maiñ sotā huuñ
to saarī raat mirā ghar safar meñ rahtā hai

nahīñ ki yaad patā us ko mere ghar kā na thā
tamām shahr meñ ghūmā idhar nahīñ aayā

dast-bardār abhī terī talab se ho jaa.eñ
koī rasta bhī to ho lauT ke ghar jaane kā

koī zanjīr phir vāpas vahīñ par le ke aatī hai
kaThin ho raah to chhuTtā hai ghar āhista āhista

phir aa.ī raat mirī saañs ruktī jaatī hai
saraktī aatī haiñ dīvāreñ phir mire ghar kī