Tags-Ghar

sub.h le jaate haiñ ham apnā janāza ghar se
shaam ko phir use kāñdhoñ pe uThā laate haiñ

ḳhudā ke ghar meñ vo barrā rahā hai ai rindo
jagāo shaiḳh ko chiḌko ba-rū-e-ḳhvāb sharāb

jo ghar bachche-bachā.e the tūfān-e-āh se
vo intizām-e-dīda-e-giriyāñ meñ aa ga.e

duniyā ke rañg anokhe haiñ
jo mere sāmne rahtā hai us ke ghar meñ ghar-vālī hai

jab aadhā din Dhal jaatā hai to ghar se afsar aatā hai
aur apne kamre meñ mujh ko chaprāsī se bulvātā hai

hai nisf-e-shab vo dīvāna abhī tak ghar nahīñ aayā
kisī se chāñdnī rātoñ kā qissa chhiḌ gayā hogā

chāñdnī-rātoñ meñ phirtā hai koī āvāra
tum ko fursat jo mile ghar se nikal kar dekho

rāste ke vāste ik jaam do
niim shab hai ab to ghar jā.ūñgā maiñ

shajar ko kaaT kar maiñ ḳhuub royā
maiñ apnā ghar banānā chāhtā huuñ

ghar jaane kī koī duujī raah nikālī jaa.e
aan ke rah meñ baiTh gayā hai ik jogī anjān

jamāl-e-yār pe yuuñ jaañ nisār kartā huuñ
fanā ke ba.ad 'fanā' ghar meñ raushnī hogī

kanda hai merā naam jahāñ aaj bhī 'nasīm'
pahchānte nahīñ usī ghar ke makīñ mujhe

ghar ke dukhḌe shahr ke ġham aur des bides kī chintā.eñ
in meñ kuchh āvāra kutte haiñ kuchh ham ne paale haiñ

halke se husn-e-tabassum kā bhī andāza huā
bojh saare din kā le kar jab maiñ apne ghar gayā

aatī jaatī huī tanhā.ī ko pahchāntā huuñ
ghar ke darvāze pe baiThā huuñ sadhāyā huā maiñ

haiñ is ḳharāb dil se mash.hūr shahr-e-ḳhūbāñ
is saarī bastī meñ ghar vīrān hai hamārā

kartā hai kaam vo dil jo aql meñ na aave
ghar kā mushīr kitnā nādān hai hamārā

maiñ apne ghar meñ huuñ ghar se ga.e huoñ kī tarah
mire hī sāmne hotā hai tazkira merā

yā ham se pareshāñ ḳhushbū thī yā band haiñ ab kaliyoñ kī tarah
yā misl-e-sabā āvāra the yā ghar se nikalnā mushkil hai

taan kar siine ko chalne hī nahīñ detī mujhe
buzdilī ghar se nikalne hī nahīñ detī mujhe