Tags-Ghar

maiñ 'jālib'-dehlavī kahlā nahīñ saktā zamāne meñ
magar samjhā hai maiñ ne aaj tak apnā hī ghar tujh ko

taraf-dārī tumheñ aatī hai apne ghar ke logoñ kī
miyāñ merī taraf-dārī bhī koī chiiz hotī hai

ayādat ke bahāne mere ghar vo roz aate haiñ
mohabbat vāloñ bīmārī bhī koī chiiz hotī hai

vo phir aayā hai 'rāhat' sulh karne
koī kah de use ghar par nahīñ maiñ

ḳhāna-e-yār ghar aafat kā hai ai rahgīro
jism par sāya-e-dīvār na aane paa.e

fikr-e-tāmīr meñ huuñ phir bhī maiñ ghar kī ai charḳh
ab talak tū ne ḳhabar dī nahīñ sailāb ke ta.iiñ

kuchh havā, aag, zamīñ, aab, falak
phir mujhe lauT ke ghar jaanā hai

shāyad na.e makān meñ un kā na dil lage
ghar chhoḌne lago to parinde bhī chhoḌ do

us ne ahbāb se pūchhā hai mire ghar kā pata
yaad aayā use paimān-e-vafā mere ba.ad

mujhī se pūchh rahā hai ye merā ham-sāya
tumhārā ghar mirā āñgan hai kyā kiyā jaa.e

girā diyā thā mire ghar ko pichhlī bārish ne
ki phir se ghaat meñ sāvan hai kyā kiyā jaa.e

miTTī kā hī ghar na hogā barbād
miTTī tire tan kā ghar bhī hogā

use zikr-e-bahār-o-bāġh se kyā
qafas ko jo samajhtā ho ki ghar hai

ghar banā kar yahāñ ye tañg aayā
uqda-e-ḳhātir āshiyāna huā

balā kī ḳhūbsūrat hai ye duniyā
ise ghar se nikal kar dekhnā thā

us ghar ke kone kone meñ yādoñ ke bhuut haiñ
almāriyāñ na khol bahut mat Darā mujhe

kāhish kā dariyā bhī ḳhvāhish kā ghar thā
paanī bharne aa.e aur nahañg bhare

sub.h dam le kar chalī ghar se talāsh-e-rozgār
shaam ham ruḳh par liye gard-e-safar vāpas hue

us ne javāban likhā
chaa.e chhoḌiye aap hamāre ghar tashrīf lā.iye

galiyoñ kī udāsī pūchhtī hai ghar kā sannāTā kahtā hai
is shahr kā har rahne vaalā kyuuñ dūsre shahr meñ rahtā hai