Tags-Ghar

ham ne ghar banāne ke
nā-murād chakkar meñ

jaane kyā baat hai ki ghar mujh ko
roz girtā huā sā lagtā hai

jis tarah fāltū gul-dān paḌe rahte haiñ
apne ghar ke kisī kone se lagā de mujh ko

fursat-e-shab meñ terā dhyān aa jaatā hai
kunj-e-chaman kyūñkar ghar kī dahlīz karūñ

girā de ghar kī dīvāreñ na shorīda-sarī meñ
havā ko rāsta denā zarūrī ho gayā hai

saath huuñ maiñ bhī ki dil kī yahī marzī hai magar
dasht bhī be-dar-o-dīvār kā ik ghar hī to hai

chahakte bolte shahroñ ko kyā huā 'nāsir'
ki din ko bhī mire ghar meñ vahī udāsī hai

rāhoñ meñ hī mile the ham rāheñ nasīb ban ga.iiñ
vo bhī na apne ghar gayā ham bhī na apne ghar ga.e

parvarda-e-havas jo husn-e-yaqīñ bhī hotā
ye karbalā-e-daurāñ hotā na ghar hamārā

kuchh shahr tumhārā tañg bhī thā kuchh tum bhī the kamzor zarā
patthar kī nigāhoñ ke Dar se tum apne hī ghar meñ asiir hue

lauT bhī aayā to sadiyoñ kī thakan lā.egā
sub.h kā bhūlā huā shaam ko ghar aane tak

ik baar to mehmān baneñ ghar pe hamāre
ye un se guzārish hai taqāzā nahīñ karte

bārish ho ki tūfān ho yā aag kā jañgal
ham ghar se nikal jaa.eñ to sochā nahīñ karte

nikālo ab mire ghar se hī mujh ko
ye sannāTā nigaltā jā rahā hai

vo ḳhālī jaan ke ghar lūTne ko aayā thā
mare adū ko ḳhabar aaj ho ga.ī ki maiñ huuñ

ġhubār-e-dil ko maiñ mizhgān-e-yār se jhāḌā
ki sach hai hotī hai jarob āstīñ ghar kī

ḳhvābīda shahr jāgne vaalā hai lauT aao
baiThī huī haiñ shaam se ghar par udāsiyāñ

yahī qāsid patā hai us ke ghar kā
udhar jā jis taraf hai rahguzar band

ye chausar ishq-bāzī kī hai ai dil
na chalnā chaal vo jis se ho ghar band

nahīñ ye putliyāñ o chashm-e-fattāñ
tire ghar meñ haiñ do fitne nazar-band