Tags-Ghar

baiTh jaatā thā maiñ thak kar apne tan kī chhāñv meñ
ek ghar hotā thā apne naam kā us gaañv meñ

ghar hī aisā thā ye kuchh dohrī masahrī vaalā
apnā rahne ke alāva bhī yahāñ rah ga.e ham

galiyoñ kī udāsī pūchhtī hai ghar kā sannāTā kahtā hai
is shahr kā har rahne vaalā kyuuñ dūsre shahr meñ rahtā hai

na jaane shahr meñ kis kis se jhuuT bolūñgā
maiñ ghar ke phūloñ ko shādāb dekhne ke liye

is ḳharābī kī koī had hai ki mere ghar se
sañg uThā.e dar-o-dīvār nikal aate haiñ

mausam sard havāoñ kā
mere ghar se niklā thā

kirdār qatl karne lage log yuuñ ki ham
apne hī ghar meñ baiTh ke āvāra ban ga.e

gosha-e-dil kī ḳhamoshī ghar meñ bhī miltī nahīñ
ghar ke hañgāme bhī kam hote nahīñ bāzār se

sochte kyā ho mire ghar meñ diyā koī nahīñ
raushnī to aa rahī hai rauzan-e-dīvār se

sochā to be-ḳhulūs thiiñ sab us kī qurbateñ
jis ke baġhair ghar mirā vīrān thā bahut

rastoñ kī tahzīb yahī hai daa.eñ baa.eñ chhoḌ ke chalnā
sīdhe hī ghar jaanā hai to muñh na lagāo dīvāroñ se

tum māh-e-shab-e-chār-dahum the mire ghar ke
phir kyuuñ na rahā ghar kā vo naqshā koī din aur

ye to maqām aur hai
dasht nahīñ ghar nahīñ

maiñ kyuuñ na phūlūñ ki us gul-badan ke aane se
bahār aaj mire ghar meñ hai chaman kī sī

mirā ghar terī manzil-gāh ho aise kahāñ taal.e
ḳhudā jaane kidhar kā chāñd aaj ai māh-rū niklā

tere shīsh-mahal kī chhat bhī shīshe kī
mere ghar kā konā konā miTTī kā

samajh ke aag lagānā hamāre ghar meñ tum
hamāre ghar ke barābar tumhārā bhī ghar hai

koī zanjīr phir vāpas vahīñ par le ke aatī hai
kaThin ho raah to chhuTtā hai ghar āhista āhista

barf thī kab thī vo havā ghar se yūñhī nikal paḌā
jism ke kaTne kā maza jaaḌe kī dhaar meñ milā

yuuñ na Tapkā thā lahū dīda-e-tar se pahle
dekhnā aag lagī phir usī ghar se pahle