Tags-Ghar

miyāñ majbūriyoñ kā rabt aksar TuuT jaatā hai
vafā.eñ gar na hoñ buniyād meñ ghar TuuT jaatā hai

khaTaktī hai kisī shai kī kamī is dār-e-fānī meñ
shikasta bām-o-dar jis ke na hoñ ghar ho nahīñ saktā

dil meñ aane kī bhalā aap ko dāvat maiñ duuñ
ghar ke mālik kabhī mehmān bhī ho sakte haiñ

yuuñ to safar kiyā hai kitne hī rāstoñ par
lekin tire hī ghar kā rasta pasand aayā

thī buzurgoñ kī jo banyā.in vo baniyā le gayā
ghar meñ jo gāḌhī kamā.ī thī vo gāḌhā le gayā

roz parchhā.iyāñ yādoñ kī parinde ban kar
ghar ke pichhvāḌe ke pīpal pe utar aatī haiñ

itnī sī baat pe achchhī nahīñ shorīda-sarī
shaam ko chiḌiyāñ to sab apne hī ghar aatī haiñ

raat hai log ghar meñ baiThe haiñ
daftar-ālūda o dukān-zada

nigāheñ muntazir the haath ḳhālī
phir ik mazdūr kaise ghar gayā thā

haa.e kyā soch ke nikle the kabhī ghar se tum
māñgte phirte ho ab sāya-e-dīvār miyāñ

savāb hai yā kisī janam kā hisāb koī chukā rahā huuñ
jo ghar ke āñgan meñ chīñTiyoñ ko maiñ roz aaTā khilā rahā huuñ

ghar ghar aapas meñ dushmanī bhī hai
bas khachā-khach bharī huī bhī hai

o jaane vaale aa ki tire intizār meñ
raste ko ghar banā.e zamāne guzar ga.e

rashk-e-jannat ban gayā thā aap ke aane se ghar
ho gayā dozaḳh se bad-tar phir chale jaane ke ba.ad

jis tarah bād-e-ḳhizāñ-dīda meñ aatī hai bahār
shahr meñ hotī hai us ke mere ghar aane meñ dhuum

dekh to le ser ho kar tujh ko ye ḳhāna-ḳharāb
aate hī kyā hai tirī itnī bhī ghar jaane meñ dhuum

jo mujhe dene ko aate the ġham apne aksar
un kī ḳhushiyoñ ne kabhī ghar bhī na merā dekhā

'nātiq' diloñ meñ nuur hai is sham-e-husn kā
raushan hai sab ke ghar kā charāġh is charāġh se

band darīche suunī galiyāñ
lauT chalo ghar raat huī hai

anjām-e-intihā-e-safar dekhte chaleñ
ab gaañv aa ga.e haiñ to ghar dekhte chaleñ