Tags-Ghar

ik din vo ghar se nikle nahīñ sair ke liye
ab ḳhvāhish-e-numū meñ sahar tak nahīñ rahī

yuuñ ḳhush hai apne ghar kī fazāoñ ko chhoḌ kar
jaise vo zindagī meñ kabhī ghar na jā.egā

ghar vaale mujhe ghar par dekh ke ḳhush haiñ aur vo kyā jāneñ
maiñ ne apnā ghar apne maskan se alag kar rakkhā hai

milā na ghar se nikal kar bhī chain ai 'zāhid'
khulī fazā meñ vahī zahr thā jo ghar meñ thā

maiñ aksar kho sā jaatā huuñ galī-kūchoñ ke jañgal meñ
magar phir bhī tire ghar kī nishānī yaad rakhtā huuñ

maiñ phir bhī shām-o-sahar be-qarār rahtā huuñ
agarche ghar meñ kisī chiiz kī kamī bhī nahīñ

kis taraf haa.e mire dil mirā lashkar chhūTā
mirā kumba mirā ḳhema mirā ghar bhar chhūTā

baat karte haiñ mohabbat kī jahāñ baste haiñ log
maiñ kahāñ rahtā huuñ kis des mirā ghar chhūTā

ghar se nikle hue beToñ kā muqaddar ma.alūm
maañ ke qadmoñ meñ bhī jannat nahīñ milne vaalī

vo parinda huuñ jise hote hī shaam
bhuul jaa.e apne ghar kā rāstā

raat aatī hai to tanhā.ī lipaT kar jaane kyoñ
ro diyā kartī hai mere ghar kī vīrānī ke saath

yuuñ to apnā lag rahā hai jism kā ye ghar mujhe
ruuh lekin kah rahī hai dekh maiñ ġhurbat meñ huuñ

apne ghar ke dar-o-dīvār ko ūñchā na karo
itnā gahrā mirī āvāz se pardā na karo

tirī havas meñ jo dil se pūchhā nikal ke ghar se kidhar ko chaliye
taḌap ke bolā jidhar vo nikle shitāb usī rahguzar ko chaliye

visāl kī shab guzar ga.ī hai jo aarzū thī vo mar ga.ī hai
hameñ to hichkī lagī huī hai vo fikr meñ haiñ ki ghar ko chaliye

'sharaf' jo ham un pe jaan deñge ḳhabar hamārī lahad meñ leñge
hilā ke shāna jalā ke ham ko kaheñge uThiye bhī ghar ko chaliye

aap to bas ghar banā kar rah ga.e
aap is ghar ko basā.eñ to sahī

zāhir meñ tum kahte ho mujh ko baiTho abhī to jaao na ghar
mujh ko to ma.alūm hai jo paiġhām gayā hai aur kahīñ

ḳhirad ko ḳhāna-e-dil kā nigah-bāñ kar diyā ham ne
ye ghar ābād hotā is ko vīrāñ kar diyā ham ne

chhupoge kyā digar rañg-e-shabistāñ kar diyā ham ne
ki apne ghar ko phūñkā aur charāġhāñ kar diyā ham ne