Tags-Ghar

maiñ ghar se jā.ūñ to taalā lagā ke jaatī huuñ
kuchh us kī shohrateñ kuchh e'tibār us kā hai

vo shahr ke hañgāmoñ meñ ḳhāmosh khaḌī hai
shāyad shab-e-hijrāñ ne mirā ghar nahīñ dekhā

ghar mire shab ko jo vo rashk-e-qamar aa niklā
ho ga.e partav-e-ruḳh se dar o dīvār safed

khiḌkiyāñ mat khol jins-e-jāñ uThā le jā.egā
ghar ke ghar ko shahr kā relā bahā le jā.egā

vo mirā saffāk dushman laakh maiñ ġhāfil na huuñ
ḳhud mire ghar se mujhe ik din bulā le jā.egā

tire juġhrāfiya kī dastaras meñ
mirī bastī mirā ghar kuchh nahīñ hai

ghar ne dekh liyā aate pardesī ko
khil uTThe darvāze taale phuul hue

ye ġhazal ki jaise hiran kī aañkh meñ pichhlī raat kī chāñdnī
na bujhe ḳharābe kī raushnī kabhī be-charāġh ye ghar na ho

umr guzrī magar ehsās yahī rahtā hai
vo abhī uTh ke mire ghar se gayā ho jaise

makāñ hai qabr jise log ḳhud banāte haiñ
maiñ apne ghar meñ huuñ yā maiñ kisī mazār meñ huuñ

is ghar ke chappe chappe par chhāp hai rahne vaale kī
mere jism meñ mujh se pahle shāyad koī rahtā thā

ye phuul kal tak sahar ke āñgan meñ khil rahā thā
magar siyāhī ke tañg halqoñ meñ ghir gayā thaa!

us ne kis naaz se baḳhshī hai mujhe jā-e-panāh
yuuñ ki dīvār salāmat ho magar ghar na rahe

ab to milte haiñ havā se bhī dar-o-dīvār-e-jism
bāsiyo mujh se nikal jaao shikasta-ghar huuñ maiñ

mere hone kā pata le lo dar-o-dīvār se
kah rahā hai ghar kā sannāTā abhī andar huuñ maiñ

kaun degā ab yahāñ se terī dastak kā javāb
kis liye mujh ko sadā detā hai ḳhālī ghar huuñ maiñ

maiñ jis meñ nahīñ huuñ aur vahīñ huuñ
vo ghar mirī raah dekhtā hai

dushman ke ghar būñdeñ barsīñ
merī chhat se bādal niklā

dil ke be-tartīb vīrāne ko ghar us ne kiyā
phir nizām-e-zindagī zer-o-zabar us ne kiyā

kahkashāñ phirtī rahī galiyoñ meñ kis ko DhūñDhtī
log kahte haiñ mire ghar tak safar us ne kiyā