Tags-Ghar

batā rahā hai jo rasta zamīñ dishāoñ ko
hamāre ghar kā vo raushan diyā udāsī hai

is se achchhe dash-e-sahrā is se achchhe gard-bād
ālam-e-vahshat meñ merā ghar koī ghar rah gayā

merā ḳhayāl hai ghar ke bahut qarīb huuñ maiñ
har ek lamha na yuuñ varna dekhtā mujh ko

paanī meñ bijlī kā ghar thā
patthar meñ chiñgārī chhupī thī

phir kisī roz tamannā ke qadam chūmūñgā
aaj to jaane diyā jaa.e mujhe ghar sā.īñ

ye kaisā shahr hai maiñ kis ajā.ib-ghar meñ rahtā huuñ
maiñ kis kī aañkh kā paanī huuñ kis patthar meñ rahtā huuñ

use ik din yahī ḳhāna-badoshī ḳhud batā.egī
maiñ apne ghar meñ rahtā huuñ ki us ke ghar meñ rahtā huuñ

gum hotī sī lagtī hai is ghar kī har ik chiiz
aa.e haiñ bāzār se kaise thake-thakā.e ham

chhoḌ kar bīmār ko ye kyā qayāmat kar chale
dam nikalne bhī na paayā aap apne ghar chale

na jā.ūñgā kabhī jannat meñ maiñ na jā.ūñgā
agar na hovegā naqsha tumhāre ghar kā sā

sair safar kar dekh tamāshā qudarat kā sab aalam kā
ghar kuuñ jhoñk bhaaḌ ke bhītar āshiq ho kar konā kyā

ġham jo miltā hai to ai tausīf siine se lagāo
kis ne lauTāyā hai yuuñ mehmān ghar aayā huā

tere ghar aa.eñ to īmān ko kis par chhoḌeñ
ham to ka.abe hī meñ ai dushman-e-dīñ achchhe haiñ

ghar se jo mire sonā yā paisa nikal aatā
kis kis se mirā ḳhuun kā rishta nikal aatā

paañv us ke bhī nahīñ uThte mire ghar kī taraf
aur ab ke rāsta badlā huā merā bhī hai

beach jañgal meñ raah bholī thī
lauT kar ghar kabhī ga.ī hī nahīñ

tum se raushan hai har ik ghar magar aisā kyuuñ hai
tum taḌaptī ho to ye jag mirā hañstā kyuuñ hai

sañg-e-buniyādī haiñ ham us ghar kā
jo kisī tarah na ta.amīr huā

dabe sho.aloñ ko bhaḌkāyā ki un kā āshiyāñ sulge
ḳhabar kyā thī jalegā jo mirā apnā hī ghar hogā

guzargāh-e-mohabbat ban ga.ī ik mustaqil bastī
lagā kar aag aayā ghar ko jo ḳhāna-ḳharāb aayā