Tags-Ghar

banāyā hī nahīñ ham ne kabhī ye soch kar 'anjum'
ki gautam kī tarah ik din hameñ ghar chhoḌ denā thā

use ziyāda zarūrat thī ghar basāne kī
vo aa ke mere dar-o-bām le gayā mujh se

udaas raat ke gudāz jism ko TaTol kar
kisī kī zulf-e-sāya-dār kī girah meñ ghar karo

jab manziloñ vahm thā na shab kā
maiñ niklā huā huuñ ghar se tab kā

sisakte bām-o-dar rotā huā ghar chhoḌ aayā huuñ
maiñ ḳhud ko ek vīrāne meñ jā kar chhoḌ aayā huuñ

firāq-e-yār meñ huuñ is qadar udaas udaas
baġhair bachchoñ ke jaise ho ghar udaas udaas

soch kī galiyoñ meñ āvāra phirtā huā
ghar ke darvāze par tanhā rahtā huuñ

raushniyoñ kā ghar bhī nahīñ miltā 'maḳhdūm'
sūraj kā saayā huuñ bhāgā rahtā huuñ

kab se khaḌe hue haiñ kisī ghar ke sāmne
kab se ik aur ghar kā patā kar rahe haiñ ham

bichhaḌne vaale ne vaqt-e-ruḳhsat kuchh is nazar se palaT ke dekhā
ki jaise vo bhī ye kah rahā ho tum apne ghar kā ḳhayāl rakhnā

in dinoñ apnī bhī vahshat kā ajab aalam hai
ghar meñ ham dasht-o-bayābān uThā laa.e haiñ

ek ik lamhe ko palkoñ pe sajātā huā ghar
raas aatā hai kise hijr manātā huā ghar

ḳhvāb ke ḳhadshe se ab niiñd uḌī jaatī hai
maiñ ne dekhā hai use chhoḌ ke jaatā huā ghar

gar zabāñ hotī to patthar hī batātā sab ko
kis qadar TuuTā hai vo ḳhud ko banātā huā ghar

us kā ab zikr na kar chhoḌ ke jaane vaale
tū ne dekhā hī kahāñ ashk bahātā huā ghar

ab use yaad kahūñ yaas kahūñ yā vahshat
mujh ko aatā hai nazar ḳhaak uḌātā huā ghar

thak gayā kyā mire tūlānī safar se 'ādil'
so gayā saath mire mujh ko sulātā huā ghar

kahāñ se lāoge tum maañ kī mamtā
agar pardes ghar hone lagā hai

jis ghar meñ farishtoñ kī ziyā thī usī ghar meñ
arvāh-e-ḳhabīsa ke charāġhāñ nazar aa.e

kis kā ye ghar banā hai kis kī galī banī hai
ham to abhī ga.e the phir ye kabhī banī hai