Tags-Ghar

sātoñ aalam sar karne ke ba.ad ik din kī chhuTTī le kar
ghar meñ chiḌiyoñ ke gaane par bachchoñ kī hairānī dekho

kyā gila tujh se ki gulshan kā muqaddar hai yahī
abr ghir kar jab bhī aayā aag hī barsā gayā

ghar banā leñge kisī bastī meñ aur
ham ne is maqsad se ghar chhoḌā na thā

ik saḌak aur mirā āTHvāñ dasvāñ chakkar
aur mujhe ilm hai vo ghar se nikalne kā nahīñ

abhī abhī maiñ jise dafn kar ke lauTā huuñ
bahut ajiib lagā us ko apne ghar pā kar

jab nazar jā na sake hadd-e-nazar se aage
kaun soche ki hai kuchh aur bhī ghar se aage

kahīñ ḳhulūs kahīñ dostī kahīñ pe vafā
baḌe qarīne se ghar ko sajā ke rakhte haiñ

hai be-ḳhud vasl meñ dil hijr meñ muztar sivā hogā
ḳhushī jis ghar kī aisī hai vahāñ kā rañj kyā hogā

adam meñ merā kyā kyā dam rukegā ek muddat tak
na.ī bastī na.ī poshāk hogī ghar nayā hogā

bayāñ thā roz-e-avval ye mire dil kī udāsī kā
baḌī us ghar kī ābādī ye hai mātam-sarā hogā

merā ghar hai ki 'mīr'-sāhib kā
uf ye hoñToñ pe talḳh talḳh hañsī

'qamar' apne ghar un ko mehmāñ bulā kar
bilā chāñd ke chāndnī raat kar lī

aadmī kī havas kā Thikānā nahīñ lekin 'anjum' ḳhudā se yahī māñgnā
ik vafādār biivī ho bachche hoñ ghar aur kyā chāhiye zindagī ke liye

zulfoñ kī tarah umr basar ho ga.ī apnī
ham ḳhāna-ba-doshoñ ko kahīñ ghar nahīñ miltā

aao āvāra-o-gurezāñ ummīdo
ghar kī vīrānī ko phir ābād karo

hamāre to ik ghar bhī hai bhaa.ī majnūñ
paḌe haiñ usī ko bayābān kar ke

sun ke marne kī ḳhabar yaar mire ghar aayā
ya.anī maqbūl huī merī vafā mere ba.ad

ghar kī mushkil koī hal chāhtī hai
mujh se vo tāj-mahal chāhtī hai

duniyā bahut ḳharāb hai jā-e-guzar nahīñ
bistar uThāo rahne ke qābil ye ghar nahīñ

har roz raah taktī haiñ mere siñghār kī
ghar meñ khilī huī haiñ jo kaliyāñ anaar kī