Tags-Ghar

jism thakā-māñda ho lekin ghar tak aate hī
ik ma.asūm hañsī se tāza-dam ho jaatā hai

bas ek baaġh thā paanī ke jis meñ chashme the
aur ek ghar thā jise ḳhaak se banāyā thā

shor meñ Duubā huā hai ghar tamām
aur sannāTā pas-e-dīvār hai

koī aa ke jaise chalā gayā koī jā ke jaise gayā nahīñ
mujhe apnā ghar kabhī ghar lagā to ḳhayāl terī taraf gayā

barsoñ bhaTkā kiyā aur phir bhī na un tak pahuñchā
ghar to ma.alūm thā rasta mujhe ma.alūm na thā

ham faqīroñ ke bhī ghar laa.ī thī un ko sādgī
ab vo lillāh hai butoñ kā kārḳhāna ho chukā

qabr se rāsta sīdhā hai ḳhudā ke ghar kā
jo udhar jaane lagā bāñdh ke ehrām aayā

zarra zarra udaas hai us kā
mere ghar kā ajiib aalam hai

dil na ka.aba hai ne kalīsā hai
terā ghar hai harīm-e-mariyam hai

ghar meñ kyā aayā ki mujh ko
dīvāroñ ne gher liyā hai

agar na miltā mujhe shaam māh-e-āvāra
yaqīn maano maiñ ghar raat tak pahuñch jaatā

ghar kī chīzoñ se yuuñ āshnā kaun hai
is ḳharābe meñ aayā gayā kaun hai

ghar se bāhar tumheñ aanā hai agar man.a to aap
apne koThe pe kabūtar to uḌā sakte haiñ

tamām shab dil-e-vahshī talāsh kartā hai
har ik sadā meñ tire harf-e-lutf kā āhañg

merī tanhā.ī se tañg aa ke mire hī ghar ne
aaj thak-hār ke dahlīz pe āñkheñ rakh diiñ

shahr-e-tarab ko jaane kis kī nazar lagī hai aaj kī shab
raste bhī vīrān paḌe haiñ ghar lagte haiñ ḳhālī se

bas ek hī rele meñ Duube the makāñ saare
'anvar' kā vahīñ ghar thā bahtā thā jahāñ paanī

nikal ke ghar se aur maidāñ meñ aa ke
zarā kuchh dekhiye tevar havā ke

is darja ishq maujib-e-rusvā.ī ban gayā
maiñ āp-apne ghar kā tamāshā.ī ban gayā

koī na dekhā ki vāpas aayā ḳhudā ke ghar ek baar jā kar
vo dair-o-ka.aba meñ hai muqayyad ḳhudā ḳhudā kar ḳhudā ḳhudā kar