Tags-Ghar

saath us ke saal bhar se chal rahā huuñ road par
apne ghar kā kyoñ baḌhātī jā rahī hai rāsta

kaleja kāñptā hai dekh kar is sard-mehrī ko
tumhāre ghar meñ kyā aa.e ki ham kashmīr meñ aa.e

habs-e-davām to nahīñ duniyā ki mar rahūñ
kaahe ko ghar ḳhayāl karūñ rahguzar ko maiñ

na vo ghar rahā na vo bām-o-dar na vo chilmaneñ na vo pālkī
magar ab bhī merī zabāñ pe hai vahī dāstāñ sin-o-sāl kī

zikr suntī huuñ ujāle kā bahut
us se kahnā ki mire ghar aa.e

ye ghar haiñ yā ba-vaqt-e-shām 'sājid'
svāgat ke liye khultī haiñ jeleñ

raunaqeñ thī shahroñ meñ barkateñ mohalloñ meñ
ab kahāñ mayassar hai ghar meñ ghar kā honā bhī

tūfān-e-balā se jo maiñ bach kar guzar aayā
vo pūchh ke sahrā se pata mere ghar aayā

ghar ke āñgan meñ ravāñ ḳhuun thā ghar vāloñ kā
aur har khet pe sho.aloñ kī ghaTā chhā.ī thī

ġharq hai ashk meñ ghar tujh se ab ai nāla-e-garm
go mire sukh kā ye manDal na jale ḳhushk to ho

chhoḌ kar ghar-bār apnā hasrat-e-dīdār meñ
ik tamāsha ban ke aa baiThā huuñ kū-e-yār meñ

sar paTkūñ jo dīvār se kahtā hai vo zālim
bas bas mire ghar kī kahīñ dīvār na TuuTe

maut mañDlā rahī hai shahroñ par
jā ke sahrā meñ ghar banāo tum

ġhair ke ghar sahī vo aayā to
ġham hī mere liye vo laayā to

peḌ ke ghoñsloñ kā kyā hogā
ghar use kaaT kar banāyā to

kis qadar zor se huī bārish
maiñ ne kāġhaz kā ghar banāyā to

subuk-sar hai vahī jo dūsroñ ke ghar pe jaatā hai
jo apne ghar meñ baiThe haiñ vo lākhoñ man ke baiThe haiñ

tū kahāñ thā ki tujhe DhūñDne mere ghar tak
kabhī bhauñre kabhī titlī kabhī jugnū aa.e

be-ta.alluq ruuh kā jab jism se rishta huā
ghar meñ lā-vāris pas-e-manzar kā sannāTā huā

āfiyat gar chāhte ho 'riñd' vāpas ghar chalo
ab tamāshā-gāh kā manzar hai kuchh bigḌā huā