Tags-Ghar

maiñ tujh se milne samay se pahle pahuñch gayā thā
so tere ghar ke qarīb aa ke bhaTak rahā huuñ

maiñ ek ḳhāna-ba-dosh huuñ jis kā ghar hai duniyā
so apne kāñdhoñ pe le ke ye ghar bhaTak rahā huuñ

maiñ apne chehre pe ḳhushiyāñ sajā.e phirtā huuñ
charāġh jalte haiñ ashkoñ ke ghar meñ shaam Dhale

ye ek aur shikāyat bhī tujh se karnī thī
ki chāñd aatā nahīñ mere ghar meñ shaam Dhale

tujh se bichhaḌ ke samt-e-safar bhūlne lage
phir yuuñ huā ham apnā hī ghar bhūlne lage

kuchh hai ki jo ghar de nahīñ paatā hai kisī ko
varna koī aise to safar meñ nahīñ rahtā

auroñ ke to ghar meñ jā kar dauḌ ke piinī aap sharāb
mere aage pī nahīñ sakte maañg ke paanī auroñ se

ham jo paḌheñ koī sher to kahnā sher se ham ko zauq nahīñ
'mīr'-hasan ke ghar meñ kahānī jā ke paḌhānī auroñ se

ham meñ jo āzād thā āzād-tar ho kar rahā
ab vahī be-ghar hai jis ke ghar kā darvāza na thā

vo ji.eñ kyā jinheñ jiine kā hunar bhī na milā
dasht meñ ḳhaak uḌāte rahe ghar bhī na milā

koī donoñ meñ kahīñ rabt-e-nihāñ hai shāyad
but-kada chhūTā to allāh kā ghar bhī na milā

'shafīq' DhūñDne nikle the ghar se ham jis ko
vo kirchiyoñ kī tarah rāstoñ meñ bikhrā hai

ghar se niklūñ to manā kar lā.ūñ
vo tabassum jo ḳhafā hai lab se

bolte the kyā parinde se dar-o-dīvār par
yaad hai ab bhī mujhe vo apne ghar kā jāgnā

ashk kī bārish meñ dil se ġham nikal aatā nahīñ
ghar se bāhar meñh barasne meñ koī jaatā nahīñ

ye zinda shahr hai to kaise 'zāhid'
maiñ mar jaatā huuñ apne ghar meñ jā kar

shaiḳh ke ghar ke sāmne āb-e-harām Daal duuñ
jām-o-subū kī aag meñ apnā kalām Daal duuñ

har-dam ilāj-e-mehr-o-vafā DhūñDte raho
is tīrgī meñ ghar kā ujālā koī to ho

ḳhushbuoñ kā shajar nahīñ dekhā
ek muddat se ghar nahīñ dekhā

jinheñ thā faḳhr navāb-o-najīb hote haiñ
ab un ke ghar meñ tamāshe ajiib hote haiñ