Tags-Ghar

baiThne vaale na baiTheñge kabhī mahfil meñ
o sitamgar tire dil meñ mirā ghar ho to sahī

chhup gayā āñkhoñ se ik nuur bas itnā kah kar
kyā batāne meñ harj thā koī ghar ho to sahī

ghar meñ laa.ī to hai betābī-e-dil dekh zarā
kahīñ pahchān na leñ ye dar-o-dīvār mujhe

junūñ kī baat chhoḌo is ga.e ghar kā Thikānā kyā
fareb-e-aql o hikmat ke parastāroñ ne kyā paayā

jo puure hone se rah ga.e the vo ḳhvāb rakkhe hue haiñ ghar meñ
yaqīn maano purānī rut ke gulāb rakkhe hue haiñ ghar meñ

tumhāre lafzoñ kī dhīmī ḳhushbū havās-e-ḳhamsa ko nochtī hai
ḳhatoñ kī sūrat meñ sach kahūñ to azaab rakkhe hue haiñ ghar meñ

visāl lamhoñ kā goshvāra alag se likkhā hai diary meñ
alag se furqat kī bebasī ke hisāb rakkhe hue haiñ ghar meñ

hameñ paḌhānā hai apne bachchoñ ko apnī nasleñ sañvārnī haiñ
isī liye to ham apnī hālat ḳharāb rakkhe hue haiñ ghar meñ

ham to na ghar meñ aap ke dam-bhar Thaharne paa.eñ
roz aa.eñ jaa.eñ sūrat-e-anfās aur log

vo sham-e-shab-anjām kī sūrat to nahīñ thā
ik pal meñ shab-e-nisf utar aa.ī hai ghar meñ

yuuñ terī tarah duur kī manzil ke musāfir
sab kuchh to nahīñ chhoḌ ke jaate kabhī ghar meñ

is zamīñ par hai be-gharī qismat
mar ke ban jaa.e apnā ghar dariyā

gadā huuñ mujh ko lekin daulat-e-kaunain hāsil hai
vo aa.eñ ghar mire taqdīr thī aisī kahāñ merī

nasība jaag uTThā aur muqaddar ban gayā apnā
jahāñ dīvār hai us kī vahīñ ghar ban gayā apnā

mātamī shaam utar aa.ī hai phir baam talak
ghar kī tanhā.ī ko bahlā.e koī kaise bhalā

yuuñ to is ghar ke dar-o-bām sabhī TuuT ga.e
haañ magar biich kī dīvār abhī rah ga.ī hai

ghar samjhā huuñ jis ko kahīñ turbat to nahīñ hai
aatī hai yahāñ shaam kī sūrat meñ sahar bhī

kaisī hai ajab raat ye kaisā hai ajab shor
sahrā hī nahīñ ghar bhī machātā hai ajab shor

baiThā huuñ diyā ghar kā jo 'nāsir' maiñ jalā ke
aisā na ho phir vo dil-e-nākām na aa.e

tulū-e-mahr se bhī ghar kī tīrgī na ghaTī
ik aur shab kaTī yā maiñ ne din tamām kiyā