Tags-Ghar

ham ko yaañ dar dar phirāyā yaar ne
lā-makāñ meñ ghar banāyā yaar ne

bas ek ḳhvāb kī sūrat kahīñ hai ghar merā
makāñ ke hote hue lā-makāñ ke hote hue

toḌ kar dil tum ne khoyā imtiyāz-e-husn bhī
ik tumhāre paas thā yā ab hai ghar ghar ā.īna

aatā jo bāhar ghar se vo hotī hameñ kyā kyā ḳhushī
gar dekh lete ham use phir ek dam yā ek pal

imārat kā koī nashsha nahīñ thā
anā ke ghar se jab niklā nahīñ thā

badan se jaañ nikalnā chāhtī hai
balā us ghar se Talnā chāhtī hai

hameñ bhī ab dar o dīvār ghar ke yaad aa.e
jo ghar meñ the to hameñ ārzū-e-sahrā thī

ghar se be-parda parī-rū jo nikal jaate haiñ
dekhne vāloñ ke īmān badal jaate haiñ

lutf duunā ho jo donoñ ghar mire ābād hoñ
tū rahe pahlū meñ terī aarzū dil meñ rahe

mire ḳhudā mujhe itnā to mo'tabar kar de
maiñ jis makān meñ rahtā huuñ us ko ghar kar de

sāhib-e-ishq ab itnī sī to rāhat mujhe de
ghar banā yā dar-o-dīvār se ruḳhsat mujhe de

jise talāsh hai ḳhush-rañg ābshāroñ kī
vo zaḳhm zaḳhm badan le ke ghar bhī aatā hai

palaT aatā hai har din ghar kī jānib shaam Dhalte hī
kisī be-nām bastī se guzar ke rāstā merā

maiñ jab bhī ghar se nikaltā huuñ raat ko tanhā
charāġh le ke koī saath saath chaltā hai

vo chain kahāñ apne ghar kā vo baat kahāñ apne ghar kī pyārā pyārā ghar apnā
vo raaj kahāñ apne ghar kā vo raat kahāñ apnī ghar kī āñkhoñ kā taarā ghar apnā

sukh chain agar duniyā meñ hai apne hī ghar meñ miltā hai sukh kā sahārā ghar apnā
dukh-dard kī gar koī davā hī apne hī ghar kī sivā hai dukh kā mudāvā ghar apnā

vo ghar vaalī sundar chaterā ghar kī sevā karne vaalī dil kā dilāsā ghar apnā
ārām hameñ dene vaalī aap musībat bharne vaalī jaan se pyārā ghar apnā

āñkhoñ ke taare lāDle ghar ke sab mil kar ghar sar pe uThāte dūdhoñ nahāyā ghar apnā
hañste-hañsāte rūThte mante sunte kahānī sote-sulāte basā-basāyā ghar apnā

ham par jaan chhiḌakne vaalā vo parvān chaḌhāne vaalā pālne vaalā ghar apnā
vo balvān banāne vaalā vo insān banāne vaalā Dhālne vaalā ghar apnā

vo paak havā apne ghar kī pyaar kī jilā apne ghar kī dil meñ samāyā ghar apnā
īsār-e-vafā apne ghar kā vo dard diyā apne ghar kī ruuh pe chhāyā ghar apnā