Tags-Ghar

kitnī dhīmī ho ga.ī hai aañch apne pyaar kī
ham dhueñ meñ ghir ga.e haiñ aur jalā jaatā nahīñ

sudh le ghar kī bhī shola-e-āvāz
duud kuchh āshiyāñ se uThtā hai

maiñ apne ghar ko bulandī pe chaḌh ke kyā dekhūñ
urūj-e-fan mirī dahlīz par utaar mujhe

ik din meñ apne ghar ke khulī chhat pe chaḌh gayā
mujh ko zamīn par nazar aayā ik āsmān

dāmān-e-taqaddus par dāġhoñ kī farāvānī
ik maulvī ke ghar meñ shaitān are tauba

ham apne ghar se bahut duur jā ke lauT aa.e
kisī kī aañkh kā kāñTā hamāre pair meñ thā

itnī aag to sāhab puurā ghar jalā degī
aañch dhīmī kar liije duudh ubal gayā hogā

nā-murād rāhoñ par lauT kar bhī kyā aate
be-gharī ke māroñ kā ghar badal gayā hogā

ghar se ai 'anjum' zarā bāhar nikal kar dekhnā
log kahte haiñ ki ab tārīk bādal chhaT ga.e

husn-e-be-parda kī garmī se kaleja pakkā
teġh kī aañch se ghar meñ mire khānā pakkā

har tarah haath uThānā hai jahāñ se mushkil
baiTh rahne ko bhī ghar chāhiye kachchā pakkā

jāntī hai mire charāġh kī lau
kaun se ghar meñ raushnī nahīñ hai

log apne dar-o-dīvār se hoshiyār raheñ
aaj dīvāne kā ghar jaane ko jī chāhe hai

aise bhī ārā.ish hotī hai ghar kī
tanhā.ī kamroñ meñ rakkhī jaatī hai

mujhe sambhāl mirā haath thaam kar le jā
thakā huā huuñ ka.ī din kā mujh ko ghar le jā

vo ab be-kār shai hai apne ghar kī
kabhī andar kabhī bāhar paḌā hai

raat be-chāñd munavvar to nahīñ ho saktī
ghar meñ be-sham.a ujālā to nahīñ ho saktā

jahāñ meñ sad.hā hazār-hā ghar base jo the vo ujaḌ ga.e haiñ
na hogā vīrān ḳhāna-e-dil jahāñ vo but aa ke bas gayā hai

dekh mohan tirī kamar kī taraf
phir gayā maanī apne ghar kī taraf