Tags-Ghar

maiñ puure dil-o-jān se ho jaatā huuñ us kā
kar letā hai jab shaḳhs koī ghar mire andar

ġhair ko sharbat-e-dīdār mubārak terā
ab to paanī bhī piyegā na tire ghar kā koī

sab ne dekhā thā kuchh uThtā huā mere ghar se
phailtā aur bikhartā vo dhuāñ maiñ hī thā

kyā chāhā thā kyā sochā thā kyā guzrī kyā baat huī
dil bhī TuuTā ghar bhī chhūTā rusvā.ī bhī saath huī

us ke ḳhat ko kaise paḌhūñ maiñ saare lafz to bhīge haiñ
merī chhat par bādal chhā.e us ke ghar barsāt huī

ghar ko din bhar kī matā-e-rah-navardī sauñp dī
sa.ī-e-paiham kā ġhubār-e-shahr thā hāsil tamām

jal ga.ī shāḳh-e-āshiyāñ miT gayā terā gulsitāñ
bulbul-e-ḳhānumāñ-ḳharāb ab kahīñ terā ghar bhī hai

zulf-ba-dosh be-naqāb ghar se nikal khaḌe hue
ab to samajh ga.e huzūr nāloñ meñ kuchh asar bhī hai

kisī kāfir kā ghar thā yā nahīñ ma.alūm jannat thī
abhī tak merī āñkhoñ meñ dar-o-dīvār phirte haiñ

ye alag baat ki bas pal-do-pal
lauT ke aate haiñ ghar āvāra

āshiq na ho to husn kā ghar be-charāġh hai
lailā ko qais sham.a ko parvāna chāhiye

pahle to chhuTe ye dair-o-haram phir ghar chhūTā phir mai-ḳhāna
ab 'tāj' tumhārī galiyoñ meñ rone ke Thikāne DhūñDhe hai

pūchh sake to pūchhe koī ruuTh ke jaane vāloñ se
raushniyoñ ko mere ghar kā rasta kaun batā.egā

jā.iye aur ḳhaak uḌā.iye aap
ab vo ghar kyā ki vo galī hī nahīñ

vīrāne meñ dīvāna ghar chhoḌ ke aayā thā
jab hogā na dīvāna ghar DhūñDhegā vīrāna

nazar azāboñ meñ ghir ga.ī hai suḳhan sarāboñ meñ aa gayā hai
sunā hai ab ke bahār-mausam ḳhizāñ kī bātoñ meñ aa gayā hai

pairoñ ko mire dīda-e-tar bāñdhe hue hai
zanjīr kī sūrat mujhe ghar bāñdhe hue hai

āñkheñ to use ghar se nikalne nahīñ detīñ
aañsū hai ki sāmān-e-safar bāñdhe hue hai

band us ne kar liye the ghar ke darvāze agar
phir khulā kyuuñ rah gayā thā ek dar mere liye

din kaTā saarā ḳharāboñ meñ bhaTakte 'aḳhtar'
shaam hotī hai chalo ḳhair se ghar koī to hai