Tags-Ghar

duur ho dard-e-dil ye aur dard-e-jigar kisī tarah
aaj to ham-nashīñ use lā mire ghar kisī tarah

ghar ke andar jaane ke
aur ka.ī darvāze haiñ

ek ghar apne liye tayyār karnā hai mujhe
aur ik bastī ko bhī mismār karnā hai mujhe

maiñ bāhar to mahfūz thā har tarah se
ghar aayā huuñ aur be-amāñ ho gayā huuñ

shajar āñgan kā jab sūraj se larzāñ hone lagtā thā
koī saaya mire ghar kā nigahbāñ hone lagtā thā

jaane kis ke ḳhauf se ghar par vahshat taarī rahtī hai
kaañp rahī hai saqf musalsal laraz rahā hai baam mirā

log to jā ke samundar ko jalā aa.e haiñ
maiñ jise phūñk kar aayā vo mirā ghar niklā

ghar ke ghar ḳhaak hue jal ke nadī suukh ga.ī
phir bhī un āñkhoñ meñ jhāñkā to samundar niklā

rāteñ guzārne ko tirī rahguzar ke saath
ghar se nikal paḌā huuñ maiñ dīvār-o-dar ke saath

huā hai kyā ki ujāloñ se Dar rahe haiñ log
tumhāre shahr kā ghar ghar baḌā ajiib lagā

ab kī baar jo ghar jaanā to saare album le aanā
vaqt kī dīmak lag jaatī hai yādoñ kī almārī meñ

apnī mahfil meñ mujhe dekh ke kahtā hai vo but
kyuuñ mire ghar meñ musalmān chale aate haiñ

vahm o ḳhirad ke maare haiñ shāyad sab log
dekh rahā huuñ shīshe ke ghar chāroñ or

qissa kishor kā nahīñ koshak kā hai ki hai
darvāza sab ke paas hai ghar kis ke paas hai

pahle jaisā rañg-e-bām-o-dar nahīñ lagtā mujhe
ab to apnā ghar bhī apnā ghar nahīñ lagtā mujhe

aise khilā vo phuul sā chehra phailī saare ghar ḳhushbū
ḳhat ko chhupā kar paḌhne vaalī raaz chhupānā bhuul ga.ī

kaliyoñ ne har bhañvre, titlī se pūchhā hai us kā naam
bād-e-sabā jis phuul ke ghar se lauT ke aanā bhuul ga.ī

ham āñsuoñ kī tarah vāste nibhā na sake
rahe jin āñkhoñ meñ un meñ hī ghar banā na sake

jo pesh pesh the bastī bachāne vāloñ meñ
lagī jab aag to apnā bhī ghar bachā na sake

avval avval to har shab qayāmat huī rafta rafta hameñ aisī aadat huī
ghar ke āñgan meñ ġham raqs karte rahe ġhul machāte rahe aur ham so ga.e