Tags-Ghar

aisā vaar paḌā sar kā
bhuul ga.e rasta ghar kā

hukm begam ke chalā karte haiñ jelar kī tarah
ab mirā ghar bhī mujhe jail huā jaatā hai

bhaa.ī do baT ga.e zamīnoñ meñ
ghar meñ dīvār ik banā dī hai

kisān khetoñ se ghar na jā paayā sochtā thā
ikaTThī pahle maiñ umr-bhar kī kapās kar luuñ

na pūchho vaj.h merī chashm-e-tar kī
miyāñ phir gir ga.ī dīvār ghar kī

niklā na maiñ bhī ghar se sunī maiñ ne bhī vo chīḳh
kitnā baḌā ilāqa sipāhī kā ho gayā

jo paañv aa.e the ghar tak mire vo us ke the
vo dil baḌhā thā jo us ke huzūr merā thā

ghar meñ hī mat use sajāo idhar udhar bhī le ke jaao
yuuñ lagtā hai jaise tum se ab tak khulī nahīñ hai duniyā

ḳhushī kā kyā hai bharosā mile mile na mile
vo mere ghar kā pata DhūñDhtī kahīñ pahuñchī

ghar meñ thā kyā ki tirā ġham use ġhārat kartā
vo jo rakhte the ham ik hasrat-e-tāmīr so hai

mohabbatoñ meñ koī tumhārā ye haal kar de to kyā karoge
bulā ke ghar meñ vo nine-one-one ko kaal kar de to kyā karoge

tabassum takallum javāñ ho ga.e
mubārak ho ghar-bār chalne lagā

ik hayūlā hai ghar ḳharābī kaa!
varna kyā ḳhaak ghar meñ rakkhā hai

āzmā.ish meñ hai vo ghaḌī iid kī chāñd ne jis ke aane kī tā.īd kī
ik phaTe pairahan par pasīne kī tah ek ghar ḳhushbuoñ meñ nahātā rahā

ham be-dar be-ghar logoñ kī ek duā bas ek duā
mālik shahr-e-gulāb salāmat ham par jo bhī aa.e azaab

bastī ke sulagte hue ghar dekh rahe haiñ
dil-doz manāzir haiñ magar dekh rahe haiñ

ḳhālī haath nikal ghar se
zād-e-safar hushyārī rakh

hayā hoTaloñ meñ hai aape se bāhar
vafā ghar ke andar bhī hai bebasī meñ

amīroñ kā maskan ġharīboñ kā ghar hai
ra.īsoñ kā dānishvaroñ kā nagar hai

javāñ mah-jabīnoñ kā ghar hai karachi
na.ī raushnī kā nagar hai karachi