Tags-Ghar

ghar kā rasta jo bhuul jaatā huuñ
kyā batā.ūñ kahāñ se aatā huuñ

maiñ to ai shahr ke hasīñ rasto
ghar se hī qatl ho ke aatā huuñ

aao 'nāsir' ham bhī apne ghar chaleñ
band is ghar ke darīche ho ga.e

bichhaḌ ke tum se abhī tak bhaTak rahī huuñ maiñ
tumhāre ghar kī taraf koī rāsta na gayā

shahr meñ tanhā thā lekin karb-e-tanhā.ī na thā
ghar se bāhar rah ke maiñ itnā to saudā.ī na thā

merī qismat hai ye āvāra-ḳhirāmī 'sājid'
dasht ko raah nikaltī hai na ghar aatā hai

jhuTpuTe ke vaqt ghar se ek miTTī kā diyā
ek buḌhiyā ne sar-e-rah lā ke raushan kar diyā

sar-giraftoñ ke liye ghar bhī qafas haiñ 'ḳhālid'
himmat ai ḳhīra-saro sar nahīñ dekhe jaate

ye haiñ na.e logoñ ke ghar sach hai ab un ko kyā ḳhabar
dil bhī kisī kā naam thā ġham bhī kisī kī zaat thī

kuchh sahmī sharmā.ī ḳhushbū
raat ga.e ghar aa.ī ḳhushbū

thak kar baasī ho jaane se
pahle ghar lauT aa.ī ḳhushbū

maiñ kaise chhoḌ duuñ ghar ko kamā.ī kī ḳhātir
maiñ ik ġharīb huuñ biTiyā mirī siyānī hai

ḳhvāb hī dekhā hai lekin haa.e kis lazzat kā ḳhvāb
vo mire ghar terā aanā aur bahlānā mujhe

ai bujhe rañgoñ kī shaam ab tak dhuāñ aisā na thā
aaj ghar kī chhat se dekhā āsmāñ aisā na thā

DhūñDhtā thā jo ik na.ī duniyā
luuT ke apne ghar gayā kab kā

mat banā ghar chaman ke andar kaaT
mat lagā dil gul-o-sanobar kaaT

do raste haiñ
donoñ tere ghar jaate haiñ

aadmī to kyā vo kahtā hai nishān-e-pā se bhī
kyuuñ paḌā hai mere kūche meñ tirā kyā ghar nahīñ

ghar kī ta.amīr chāhe jaisī ho
us meñ rone kī kuchh jagah rakhnā

masjideñ haiñ namāziyoñ ke liye
apne ghar meñ kahīñ ḳhudā rakhnā