Tags-Ghar

baḌe baḌe mahloñ meñ rahne vaale log
apne ghar meñ ḳhud mehmānoñ jaise the

maiñ kyuuñ karūñ kisī ko makīn-e-makān-e-dil
maiñ kyuuñ kahūñ kisī se ki tū ghar mirā bigāḌ

muñDā kar ḳhatt-e-ruḳh us mah-laqā ne
kiyā hai aa.ine kā ghar safā-chaT

ye ghar jis kā hai us ne vāpas aanā hai 'zafar' is meñ
isī ḳhātir dar-o-dīvār ko mahkā.e rakhte haiñ

us ghar meñ karam jab tū ne kiyā kuchh der Thahar ai tīr-e-nazar
bosa tire qadmoñ kā dil ne kis shauq se ai mehmān liyā

ghar kā kuaañ bhī be-masraf sā
sāgar meñ tezāb bharā hai

haiñ ajiib murġh-e-shikasta-par na chaman meñ ghar na qafas meñ ghar
jo gire to saaya haiñ ḳhaak par jo uThe to mauj-e-havā hue

kabhī bulāo, kabhī mere ghar bhī aayā karo
yahī hai rasm-e-mohabbat, ise nibhāyā karo

hamāre hisse meñ maañ kī duā.eñ aa.iiñ 'kañval'
tum apne hisse kī daulat se ghar sajāyā karo

sho.aloñ kī is hamdardī par dil meñ laavā paktā hai
jab saarī bastī phūñkī thī kyuuñ merā ghar chhoḌ diyā

saarā ghar sotā hai do ghanTe meñ aa.egā aḳhbār
aaj 'muzaffar' pāñch baje hī kaise bistar chhoḌ diyā

hamāre ghar ko lagī aag jin charāġhoñ se
qusūr-vār hamī thī unheñ jalāne ke

ik sulagtā āshiyāñ aur bijliyoñ kī anjuman
pūchhtā kis se ki mere ghar meñ kyā thā kyā rahā

lagtā hai muqaddar meñ mire saaya nahīñ hai
muddat se safar meñ huuñ to ghar kyuuñ nahīñ aayā

ai shāḳh-e-vafā phir vo parinda nahīñ lauTā
maiñ ghar meñ thā niklā nahīñ bāhar ka.ī din tak

muddatoñ jo rahe bahāroñ meñ
aaj vo ghir ga.e haiñ kāñToñ meñ

jaane kab ḳhāna-badoshī ke ye din guzreñge
muddateñ ho ga.iiñ dekhe hue ghar kī sūrat

jatāte rahe ham safar meñ haiñ lekin
bhaTakte rahe apne ghar se nikal ke

sarāsar silsila patthar kā chashm-e-nam ke ghar meñ hai
koī ab ḳhvāb dekhe bhī to kyuuñ ta.abīr ho paidā

butoñ ke ghar kī taraf ka.abe ke safar se phire
hazār shukr ki jiite ḳhudā ke ghar se phire