Tags-Ghar

koī bhī dastak kare aahaT ho yā āvāz de
mere hāthoñ meñ mirā ghar to hai darvāza nahīñ

ye sochā hai ki ab ḳhāna-badoshī kar ke dekhūñgā
koī aafat hī aatī hai agar maiñ ghar banātā huuñ

tanhā.ī-pasandī mirī fitrat kā bhī juz thā
mausam bhī ye kahtā hai nikalnā nahīñ ghar se

mil rahī hai jab hameñ ik rāhat-e-āvārgī
lauT kar is anjuman se apne ghar jā.egā kaun

ḳhazīne jaañ ke luTāne vaale diloñ meñ basne kī aas le kar
sunā hai kuchh log aise guzre jo ghar se aa.e na ghar ga.e haiñ

kyoñ na is bhūle ko yaad aayā bhalā ghar kā patā
kuchh ḳhatā ham se huī yād-dahānī meñ kahīñ

sidhāreñ shaiḳh ka.aba ko ham inglistān dekheñge
vo dekheñ ghar ḳhudā kā ham ḳhudā kī shaan dekheñge

abr kā TukḌā koī bālā-e-bām aatā huā
mere ghar bhī sabz mausam kā payām aatā huā

aayā thā pichhlī raat dabe paañv mere ghar
pāzeb kī ragoñ meñ jhanak chhoḌ kar gayā

be-ghar honā be-ghar rahnā sab achchhā Thahrā
ghar ke andar ghar nahīñ paayā shahr meñ paayā shahr

purāne ghar se nikal kar na.e makān kī samt
bahut se log ga.e ik ajab jahān kī samt

zabt-e-girya se hai nuqsāñ qasr-e-tan ke vāste
baiTh hī jā.egā ghar paanī agar mar jā.egā

auroñ ke ghar raushan karne
saarī saarī raat jale the

bach hī niklā huuñ maiñ jaaḌe kī baḌī yalġhār se
garm ab ke ghar badan kā ḳhas jalāne se huā

chalte chalte maiñ us ko ghar le aayā
vo bhī apnā haath chhuḌānā bhuul gayā

ghuT gayā tahzīb ke gumbad meñ har ḳhvāhish kā dam
jañgaloñ kā mor ham ne ghar ke andar rakh liyā

pheñk deñ galiyāñ birūn-e-sahn sab is ne 'adīm'
ghar ki jo māñgā thā maiñ ne vo pas-e-dar rakh liyā

hamāre ghar meñ to mīnār ban ga.ī har iiñT
chhatoñ kī had meñ uThāte haiñ sar dar-o-dīvār

ḳhabar na phailne paa.e ki jā rahā hai koī
nahīñ to sar pe uThā leñge ghar dar-o-dīvār

chand gūñgī dastakeñ haiñ ghar ke darvāze ke bāhar
chīḳh sannāToñ kī hai saarā makāñ sar par uThā.e