Tags-Ghar

jañgaloñ se guzarne vāloñ ke
rāste mere ghar pe nikle haiñ

jalā hai dil yā koī ghar ye dekhnā logo
havā.eñ phirtī haiñ chāroñ taraf dhuāñ le kar

kis ke liye pairoñ ko aziyyat meñ rakhā jaa.e
ḳhud DhūñD ke tanhā.ī chalī aa.ī hai ghar meñ

shāyad ab tak mujh meñ koī ghoñsla ābād hai
ghar meñ ye chiḌiyoñ kī chahkāreñ kahāñ se aa ga.iiñ

ye bhed sab pe ujāgar huā to kaise huā
ki mere dil meñ tirā ghar huā to kaise huā

sambhāl vaa.iz zabān apnī ḳhudā se Darā ik zarā hayā kar
butoñ kī ġhībat ḳhudā ke ghar meñ ḳhudā ḳhudā kar ḳhudā ḳhudā kar

qatl kar ke vo ġhanīmoñ ko jo vāpas aa.e
apne hī ghar meñ unheñ koī shanāsā na milā

tīrgī aisī ġhazab kī ki ayāzan-billāh
aisā lagtā hai ki ghar hai dar-o-dīvār nahīñ

tū jahāñ ek baar aayā thā
ek muddat se hai vo ghar ḳhāmosh

uTh ga.e kaise kaise pyāre log
ho ga.e kaise kaise ghar ḳhāmosh

saath chalnā hai to phir chhoḌ de saarī duniyā
chal na paa.e to mujhe lauT ke ghar jaane de

mumkin nahīñ hai ye ki bhare kāsa-e-tama.a
din meñ karoḌ ghar jo phirā de gadā-e-hirs

ghar aap hī jagmagā uThegā
dahlīz pe ik qadam bahut hai

tum to ai mehrbān anūThe nikle
jab aan ke paas baiThe rūThe nikle

āñgan se dastakoñ kī sadā lauT aa.egī
vīrāniyoñ kā naam har ik ghar pe naqsh hai

na phuul bāloñ meñ gūñdhe na ghar meñ diip jalāyā
sharīk-e-ġham ne manāyā magar na un se manī vo

ḳhalq-e-ḳhudā hai shaah kī muḳhbar lagī huī
ḳhāmoshiyoñ kī bhiiḌ hai ghar-ghar lagī huī

ḳhush thī maiñ chhoTe se ghar meñ bhī tire pyaar ke saath
maiñ ne kab tujh se kisī mahl kī chāhat kī hai

umiid kī koī chādar to sāmne aa.e
maiñ ruk bhī jā.ūñ tirā ghar to sāmne aa.e

tum ne fursat paa.ī ghar baiThe tabīb
mar gayā bīmār achchhā ho gayā