Tags-Ghar

ik raat to kyā vo hashr talak rakkhegī khulā darvāze ko
kab lauT ke tum ghar aaoge sajnī ko batāo inshā-jī

aisā jhagḌā batā do mujh ko jo
ghar meñ dīvār tak nahīñ pahuñchā

vaqt hai ab bhī manā luuñ chal ke us ko ek din
ghar nikal jā.egā varna ek din ghar chhoḌ kar

ghar se nikle hue beToñ kā muqaddar ma.alūm
maañ ke qadmoñ meñ bhī jannat nahīñ milne vaalī

jab se bāñdhā hai tasavvur us ruḳh-e-pur-nūr kā
saare ghar meñ nuur phailā hai charāġh-e-tūr kā

tujh ko laa.e ghar meñ jannat ko jalāyā rashk se
ham-baġhal tujh se hue pahlū dabāyā huur kā

qasr-e-tan bigḌā kisī kā gorkan kī ban paḌī
ghar kisī kā gir paḌā ghar bin gayā mazdūr kā

mūziyoñ ko hādsoñ se dahr ke kyā ḳhauf hai
bārish-e-bārāñ se ghar girtā nahīñ zambūr kā

shauq hai to hai us kā ghar nazdīk
dūrī-e-rah hai rāhbar nazdīk

ḳhush nasīboñ ko ghar milā yaaro
mere hisse meñ phir safar aayā

paar utrā ufuq ke sūraj to
phir musāfir ko yaad ghar aayā

kaafī hai boriyā hī faqīroñ ke vāste
ma.ayūb hai jo sheroñ ke ghar meñ palañg ho

ab to āñkheñ paap bharī haiñ ek samay yaaro aisā thā
agle ghar kī chhat ke pīchhe chāñd bahut pyārā lagtā thā

ghar se niklo dhuup meñ baiTho dekho us pīpal kā saaya
jis ke nīche tum aisā ik bholā bachcha khel rahā thā

yuuñ to harī-bharī rāhoñ meñ roz nayā melā lagtā hai
jab maiñ ghar se niklā yā to maiñ thā yā mirā saayā thā

ab apne ghar ke liye ik na.ī zamīñ socho
zamīñ ke sar pe koī taaza āsmāñ dekho

fikr-e-ma.āsh ne sabhī jazboñ ko sard kar diyā
saḌkoñ pe din guzar gayā ho ke niDhāl ghar ga.e

thā mū mujhe aamad meñ koī us kī ki nāgāh
le jaa.e na ghar se kahīñ bāhar tapish-e-dil

apne ghar meñ qayām kar jaao
chand lamhe kalām kar jaao

kaun haiñ kis jagah haiñ ki TuuTā hai jin ke safar kā nasha
ek Duubī sī āvāz aatī hai paiham ki ghar jā.eñge