Tags-Ghar

akele ghar se pūchhtī hai be-kasī
tirā diyā jalāne vaale kyā hue

jab bhī ghar kī chhat par jaa.eñ naaz dikhāne aa jaate haiñ
kaise kaise log hamāre jī ko jalāne aa jaate haiñ

ab manzil-e-sadā se safar kar rahe haiñ ham
ya.anī dil-e-sukūt meñ ghar kar rahe haiñ ham

yuuñ hī apne ghar se nikal aa.e haiñ
safar aaj phir be-irāda kiyā

guzishta shab maiñn ne ek ḳhvāb dekhā
khulā apne ghar kā har ek baab dekhā

raste meñ 'fahīm' us kī tabī.at kā bigaḌnā
ghar jaane kā ik aur bahāna to nahīñ hai

dasht-navardī kā qissa to sab likhte haiñ
kis ghar meñ hai kitnā sahrā kaun likhegā

qadr-o-qīmat in añdheroñ kī na pūchho mujh se
raushnī ghar meñ charāġhoñ ke jalāne se huī

ārzūoñ kā nagar chhoḌ aa.e
naaz thā jis pe vo ghar chhoḌ aa.e

ghar ke bāhar bhī udāsī na ga.ī
ghar se ghabrā ke jo ghar chhoḌ aa.e

ḳhayāl-o-ḳhvāb se ghar kab talak sajā.eñ ham
hai jī meñ ab to ki jī ḳhud se bhī uThā.eñ ham

ajiib vahshateñ hisse meñ apne aa.ī haiñ
ki tere ghar bhī pahuñch kar sakūñ na paa.eñ ham

vo ghar to jal bhī chukā jis meñ tum hī tum the kabhī
ab us kī raakh se duniyā na.ī basā.eñ ham

kabhī khilo bhī ye kyā hai ki 'āftāb-husain'
paḌe raho yūñhī ghar par kisī ke aao na jaao

nahīñ hai kuchh bhī magar dil ye chāhtā hai bahut
ki ek roz zarā chal ke apnā ghar kholeñ

taa.ir ke liye din raat kā Dar
dahlīz pe rizq aur taaq meñ ghar

koī apne ghar se nikaltā nahīñ
ajab haal hai aaj kal shahr kā

dil ko vo kyā dekhte soz-e-jigar dekhā kiye
lag rahī thī aag jis ghar meñ vo ghar dekhā kiye

bas hī kyā thā be-zabāñ kahte bhī kyā sayyād se
yaas kī nazroñ se muḌ kar apnā ghar dekhā kiye

vo jā.egā to is ke ba.ad dukh hī ghar meñ aa.egā
na jaane kis ummīd par saje hue haiñ bām-o-dar