Tags-Ghar

na uThtī koī nigāh-e-ġhalat sar-e-mahfil
vo apne jalve ko ghar apne chhoḌ kar aate

jhalak to dekho hamāre ghar kī yahāñ haiñ naanī yahāñ haiñ taa.ī
hamāre maañ baap aur chachā haiñ yahāñ haiñ bahneñ yahāñ haiñ bhaa.ī

paañv mere bhī nahīñ uThte the ghar kī jānib
tum bhī jaate hue lauT aa.e the aisā kyā thā

ab ke barsāt to ghar kar ke hī mismār ga.ī
dar ko rokā thā thapeḌoñ meñ ki dīvār ga.ī

ho ga.e gosha-nashīñ ghar meñ jo ham ḳhāk-basar
kaun sī ābrū-e-kūcha-o-bāzār ga.ī

''maiñ haar gayā hūñ''
maiñ ne apne ghar kī dīvāroñ par likkhā hai

raat din yaar baġhal meñ ho to ghar behtar hai
varna is ghar ke to rahne se safar behtar hai

hameñ to TuuTī huī kashtiyāñ nahīñ dikhtīñ
hamāre ghar se hī dariyā dikhā.ī detā hai

to ye hotā hai ham ghar se nikalnā chhoḌ dete haiñ
kabhī apnī galī ke log jab achchhe nahīñ lagte

jā rahe ho ḳhudā ke ghar ya.anī
vo tumheñ ḳhud se duur lagtā hai

hamāre naam kī taḳhtī nahīñ hai
magar vo ghar to ḳhvāboñ se gayā na.iiñ

bechāre ke paañv kabhī dahlīz kabhī darvāze par
ghuum rahā hai ghar meñ bañdhā bañdhā vo ik banjārā sā

mere ghar terā aanā jaanā thā
vo bhī ai yaar kyā zamāna thā

tū 'anvarī' hai na 'ġhālib' to phir ye kyuuñ hai 'farāz'
har ek sail-e-balā tere ghar ko jaatā hai

baġhair chaak kiye ghar se maiñ agar niklūñ
to mujh ko merā garebān rok letā hai

balā use bhī to kahte haiñ log aalam meñ
ajab hai kis liye vo mere ghar nahīñ aatā

nikle kabhī na ghar se magar is ke bāvajūd
apnī tamām umr safar meñ guzar ga.ī

tumhārī muntazir yuuñ to hazāroñ ghar banātī huuñ
vo rasta bante jaate haiñ kuchh itne dar banātī huuñ

aaj se pahle merā ghar
soyā soyā rahtā thā

us ghar ke muqaddar meñ tabāhī na likhī ho
vo jis ne ḳhayāl apne makīñ kā nahīñ rakkhā