Tags-Ghar

luTte haiñ bahut sahl ki din aise kaḌe haiñ
ghar meñ nahīñ jaise kahīñ jañgal meñ paḌe haiñ

kis din ghar aayā 'jāved'
kab paayā hai us ko bahāl

ghar kā matlab badalne vaalā hai
tere ghar meñ bulāyā jā.uñgā

dil sā ghar Dhā diyā to kis muñh se
baat karte ho ghar basāne kī

mere is ghar meñ añdherā kabhī hotā hī nahīñ
haiñ mire siine meñ jalte hue zaḳhmoñ ke charāġh

lagī vo aag ki dīvār-o-dar bhī chal nikle
koī muqīm nahīñ ghar meñ ab sutūñ ke sivā

bahut pahchāntā huuñ zāhidoñ ko
tumhāre ghar kā maiñ rasta rahā huuñ

din bhar ke masrūf qadam
jab lauT ke ghar ko aate haiñ

ik-ādh ghar to jal gayā par shahr bach gayā
ab ke diye kā saath havā ne nahīñ diyā

dekho nā-ummīdī ko aise Theñgā dikhlāte haiñ
aksar apne ghar kī kunDī ḳhud ham ne khaTkā.ī yaar

achchhī bastī achchhā ghar achchhe bachche achchhe hālāt
jis ke dekho saath lagī hai ik ḳhvāhish ābā.ī yaar

'riyāz' shaam Dhalī ab to ghar ko lauT chalo
tulū-e-sub.h se pahle ke nikle ho ghar se

aur kuchh lamhe Dubo deñ chaa.e meñ
yaar is garmī meñ ghar jaa.eñ bhī kyā

kanda is mere nagīn-e-dil pe terā naam hai
us ko apne ḳhātam-e-dil ke na kar ghar se judā

sūrat-e-bādām-e-tav-am roz-o-shab hotā nahīñ
chashm-e-dilbar kā tasavvur chashm ke ghar se judā

aa ke mere ghar kā 'ātif' ye tamāsha dekhiye
mere dar-dīvār ko chhat kā sahārā bhī nahīñ

merā saarā badan raakh ho bhī chukā maiñ ne dil ko bachāyā hai tere liye
TuuTe phūTe se dīvār-o-dar haiñ sabhī phir bhī ghar ko sajāyā hai tere liye

kitnī mehnat huī ḳhuuñ pasīna huā jism miTTī huā rañg mailā huā
ḳhud to jaltā rahā dozaḳhoñ meñ magar ghar ko jannat banāyā hai tere liye

tīrgī shab kī kam nahīñ hogī
ghar ke andar diye jalāne se

dil har ghaḌī kahtā hai yuuñ jis taur se ab ho sake
uTh aur sambhal ghar se nikal aur paas us chanchal ke chal