Tags-Ghar

ai dil vaalo ghar se niklo detā dāvat-e-ām hai chāñd
shahroñ shahroñ qariyoñ qariyoñ vahshat kā paiġhām hai chāñd

ham is lambe-chauḌe ghar meñ shab ko tanhā hote haiñ
dekh kisī din aa mil ham se ham ko tujh se kaam hai chāñd

dil-āzārī kī miTTī se īstāda ghar
un be-faiz daroñ tak kaun savālī jaa.e

bujhā ke taaq kī sham.eñ na dekh tāroñ ko
isī junūñ meñ to barbād ghar hamāre hue

ik bachcha us khulī huī khiḌkī meñ jhāñk kar
sharmā ke ghar jo bhāgā to maañ se lipaT gayā

ik ret kī jabīn pe patthar kī Thokareñ
be-ghar musāfiroñ ko Thikāne diye ga.e

ham tīrgī ke saath numāyāñ the bazm meñ
un ko to un ke ghar se bhī laane diye ga.e

kar rakhe the band us par maiñ ne darvāze
ghar meñ ab kitnī ghuTan hai kitnī sīlan hai

jaale bun kar makaḌiyāñ mahfūz rakheñgī use
vaqt-e-ruḳhsat ghar meñ naam allāh kā chhoḌ aa.e haiñ

dil-e-āshiq meñ ho ai 'mashriqī' gar jazb-e-dil kāmil
vo but phir kyuuñ na maa.il ho koī ghar kī ḳhudā.ī hai

har ik se pūchhte phirte haiñ tere ḳhāna-ba-dosh
azāb-e-dar-ba-darī kis ke ghar meñ rakkhā jaa.e

maiñ ghar se duur utāq-e-badan meñ rahtā huuñ
savād-e-hijr ke bāb-e-kuhan meñ rahtā huuñ

maiñ apne ghar ke añdheroñ meñ lauT aayā 'shauq'
pukārtā hī rahā mujh ko shahr-e-zāt us kā

ḳhayāl-o-ḳhvāb meñ dīvār-o-dar bhī saath rakkho
musāfirat meñ raho aur ghar bhī saath rakho

phir na maiñ raat ga.e tak lauTā
Dūbtī shaam jo ghar se niklā

hamāre pyaar kī shohrat huī thī yuuñ zamāne meñ
varaq saḌkoñ pe bikhre the kahānī ghar pe rakkhī thī

zindagī gaañv kī hasīñ laḌkī
ghir ga.ī hai tamāsh-bīnoñ meñ

nazar aatā nahīñ ab ghar meñ vo bhī uf re tanhā.ī
ik ā.īne meñ pahle aadmī thā merī sūrat kā

aise khilā vo phuul sā chehra phailī saare ghar ḳhushbū
ḳhat ko chhupā kar paḌhne vaalī raaz chhupānā bhuul ga.ī

dasht-o-dariyā ke amiiñ bhī to haiñ āvāra nasīb
sā.ebāñ koī bhī ho apnā hī ghar chāhte haiñ