Tags-Ghar

ghar sulagtā sā hai aur jaltā huā sā shahr hai
zindagānī ke liye ab do-jahāñ kā qahr hai

zindagī se bhaag kar 'parkāsh' maiñ jā.ūñ kahāñ
ghar ke bāhar qahr hai aur ghar ke andar zahr hai

havā ho tez to dīvār-o-dar tharrāne lagte haiñ
magar is ḳhauf se ghar chhoḌ ke jaayā nahīñ jaatā

ġharībī ko to mil hī jaatī hai do vaqt kī roTī
magar daulat ke ghar rāhat bahut mushkil se aatī hai

mausam badlā bijlī chamkī manzar saarā bhiig gayā
apne apne ghar chalne kī baat karo to behtar hai

apnī tanhā.ī ko bāzār ghumā laayā huuñ
ghar kī chaukhaT pe pahuñchte hī lipaTtī hai mujhe

nādāñ na samajh jahān ko ghar
is ghar se kabhī safar bhī hogā

miTTī kā hī ghar na hogā barbād
miTTī tire tan kā ghar bhī hogā

apnā hī shahr ham ko baḌā ajnabī lagā
apne hī ghar kā ham ko pata pūchhnā paḌā

is shahr-e-be-charāġh meñ jā.egī tū kahāñ
aa ai shab-e-firāq tujhe ghar hī le chaleñ

dil meñ zauq-e-vasl o yād-e-yār tak baaqī nahīñ
aag is ghar meñ lagī aisī ki jo thā jal gayā

aage baḌhe to tīrgī-e-shab ne aa liyā
nikle the ghar se sub.h ke āsār dekh kar

zehn meñ aulād hai aur ghar kī jānib huuñ
ruk nahīñ saktā abhī raftār meñ huuñ maiñ

ghar kī har shai kyuuñ mujhe be-nūr lagtī hai
kyā ziyāda aaj kal bāzār meñ huuñ maiñ

safar ke ba.ad bhī zauq-e-safar na rah jaa.e
ḳhayāl-o-ḳhvāb meñ ab ke bhī ghar na rah jaa.e

hai burā yā bhalā jo kuchh ki hai terā hai 'huzūr'
is ke ta.iiñ ghar se mat apne tū nikāl apnā hai

jo ġham ke sho.aloñ se bujh ga.e the ham un ke dāġhoñ kā haar laa.e
kisī ke ghar se diyā uThāyā kisī ke dāman kā taar laa.e

na ghar sukūn-kada hai na kārḳhāna-e-ishq
magar ye ham haiñ ki likhte rahe haiñ nāma-e-ishq

habs kī rut meñ koī taaza havā kā jhoñkā
bād-o-bārāñ ke ḳhudā mere bhī ghar se guzre

band mile jab ghar ke dar
āñgan meñ jā leTī raat