Tags-Ghar

muflisī jin ke muqaddar meñ likhī hai 'shamsī'
un ke ghar bajtī nahīñ hai kabhī shahnā.ī bhī

nazar kī kyā kaheñ ab to jigar bhī ho ga.e patthar
kahāñ bū-e-vafā khoī ki ghar bhī ho ga.e patthar

ham bhī kar leñ jo raushnī ghar meñ
phir añdhere kahāñ qayām kareñ

maiñ apne ghar meñ huuñ ghar se ga.e huoñ kī tarah
mire hī sāmne hotā hai tazkira merā

log kaheñge tumheñ harjā.ī hai
dil meñ ik aalam ke na ghar kījiye

ġhair ko jā dete ho ghar meñ agar
mere ta.iiñ shahr-badar kījiye

sātoñ aalam sar karne ke ba.ad ik din kī chhuTTī le kar
ghar meñ chiḌiyoñ ke gaane par bachchoñ kī hairānī dekho

ab dasht-e-be-amāñ hī meñ shāyad mile panāh
ghar kī khulī fazā meñ to baḌhne lagī ghuTan

misl-e-sabā koī idhar aayā udhar gayā
ghar meñ basī huī hai magar bū-e-pairahan

kitne ārām-deh ghar is aag kī nazr ho ga.e
kitnī ālī-shān imārateñ

dil-e-rāhat-talab ko qabr meñ kyā be-qarārī hai
mujhe ghabrā.e detī hai udāsī is na.e ghar kī

Dar hai ki na le jaa.e vo ham ko bhī churā kar
ham laa.e haiñ ghar meñ jise mehmān banā kar

saare chehre haiñ ye to anjāne
mehmāñ kis ke ghar rahā huuñ maiñ

kisī ne pūchhā nahīñ lauTte hue mujh se
maiñ aaj kaise bhalā ghar meñ shaam se aayā

ghir ga.ī hai do zamānoñ kī kashākash meñ hayāt
ik taraf zanjīr-e-māzī ek jānib haal hai

dīvār kā bojh baam par hai
ye ghar bhī huā ḳharāb kaisā

bāhar jo maiñ niklūñ to barahna nazar aa.uuñ
baiThā huuñ maiñ ghar meñ dar-dīvār pahan kar

dil kī shikast-o-reḳht kī mere to le ḳhabar
har ghar kī der-pā.ī ko ta.amīr shart hai

shaam bhī Dhal rahī hai ghar bhī hai duur
kitnī der aur maiñ rukūñ sāhab

mujh se ghar aane ke vaade par bigaḌ kar bole
kah diyā ġhair ke dil meñ abhī ghar paidā kar